Ina quarantina da persunas è sa radunada avant intgins dis a la staziun da la teleferica da Charmey en la regiun da Gruyère. Ellas èn vegnidas ensemen per dar in turnier da cartas in zic pli spezial. I va per tempo ed igl è d'avantatg da betg avair tema da las autezzas. Giugà vegn numnadamain durant ch'ins è sin viadi cun la telecabina, declera Pauline Pittet, la scheffa da marcheting da la teleferica da Charmey.
I dat en tut quatter rundas. Ina cura ch'ins va ensi ed ina cura ch'ins va engiu e quai duas giadas. Ed en tut datti sis gieus per runda.
Avant ch'i va dentant liber ston las telecabinas anc vegnir adattadas. Gidanters installeschan en mintga cabina ina pitschna maisa cun in tarpun verd. E lura vai era gia liber. Mintgamai en quatter sesan ils participants en ina telecabina e strusch che las portas sa serran vegnan las cartas repartidas. Patricia giauda l'ambient nunusità.
Igl è schon ina pitschna sfida da seser en ina telecabina e da sa concentrar sin las cartas. Ma quai è grondius.
Da quell'opiniun è era Rafael, era sch'el crai che inqualin pudessi avair fadia cun la situaziun.
Per mai vai fitg bain, mo inquala persuna pudess survegnir il mal da mar.
Marie-Louise chatta l‘entir’acziun ina buna chaussa. I vegni fatg il meglier or da la situaziun che la naiv manchia.
Ins sto guardar ch'ellas vivan vinavant, quellas staziuns en las autezzas mesaunas. Plinavant èn ellas plain ideas e quai chat jau super.
Grond plaschair che l'offerta frunta sin in bun resun ha Claude Gendre, il directur da la teleferica da Charmey.
Nus essan gist vidlonder da transfurmar noss manaschi sin tuttas quatter stagiuns, quai ch'è fitg impurtant per nus. E l’enviern avain nus da quels temps nua ch'i marscha pauc. E perquai che las telefericas èn tuttina en funcziun avain pensà; pertge betg duvrar auter ellas quest enviern?
Turniers da cartas èn dentant mo in'offerta che duai carmalar era lura ils osps en il territori sche la naiv manca. En il decurs dals ultims onns han ils turistichers da la regiun era creà sendas enferradas, percurs da downhill per mountainbike sco era sendas da viandar cun tirolaisas per mo numnar intginas. Per els è numnadamain cler: Il sport d’enviern sulet n’emplaina betg pli avunda las cassas.