La Svizra vegn a sa barattar cun ils stadis commembers dal spazi Schengen ed a sa participar vi da la «solidaritad da l’entir’Europa». Er ils chantuns sajan s’exprimids a moda positiva en chaussa. Dapli detagls n’ha la cussegliera federala Karin Keller-Sutter dentant betg dà.
In di trist sco ditg betg pli
Cun las acziuns russas en l'Ucraina ha cumenzà sin terren europeic in conflict armà. Il Cussegl federal appellescha a las partidas involvidas da respectar il dretg internaziunal. La Russia haja cuntrafatg al scumond da violenza ed il principi territorial.
Quai ch'appartegn sancziuns ha il Cussegl federal decidì ina posiziun pli dira. El augmenta las mesiras cunter emprovas da guntgir las sancziuns da l'UE en la Svizra. En il sectur da finanzas e da viagiar suonda la Svizra per gronda part a la posiziun da l'Uniun europeica.
Ambassada a Kiev evacuada
Cura ch'i era vegnì enconuschent che l'armada Russa era arrivada a Kiev, è l'ambassada svizra vegnida evacuada. Quai per garantir la segirezza da las collavuraturas e dals collavuraturs. Intginas persunas èn dentant restadas enavos per pudair garantir vinavant quai che auters stadis na pon betg pli: Ch'il dialog cun la Russia possia cuntinuar.
