D’ina vart na vegnia la Russia betg envidada a la conferenza da pasch en Svizra; ma da l’autra vart vegnia dà tier ch’i na dettia naginas decisiuns senza la Russia. E damai che la Russia na saja betg da la partida il zercladur, vegni uss pretendì ch'ella refuseschia tractativas da pasch. Quai ha ditg Putin tenor agenturas da novitads russas tar in inscunter cun il president dal Belarus, Alexander Lukaschenko. L’ambassada russa a Berna aveva dentant gia declerà la mesemna che la Russia na fetschia betg part da la conferenza da pasch sin il Bürgenstock – era betg sch’ins vegniss envidà.
Svizra na reagescha betg sin questa critica
Il Departament federal da l'exteriur na reagescha betg sin la critica dal president russ Wladimir Putin. Ins na commenteschia betg ils pleds da schefs da stadi da l'exteriur, uschia il departament federal envers l'agentura da novitads Keystone SDA.
Cumissiun UE beneventa la conferenza da pasch en Svizra
La cumissiun da l'Uniun europeica (UE) sa participass «cun plaschair» a la conferenza da pasch da l'Ucraina sin il Bürgenstock. Ella n'ha dentant anc betg survegnì in'invitaziun uffiziala per quest'occurrenza, quai ha ditg ina pledadra da la cumissiun da l'UE gievgia sin dumonda da l'agentura da novitad Keystone-SDA a Brüssel. Il president dal cussegl europeic Charles Michel ha discurrì d'ina participaziun fitg probabla da sia vart. Tgi che fa part da la cumissiun da l'UE n'era anc betg enconuschent. La cumissiun beneventa dentant l'annunzia da la regenza svizra d'organisar ina conferenza davart la pasch en l'Ucraina.
La mesemna aveva il Cussegl federal annunzià d'organisar ina conferenza da pasch per l'Ucraina ils 15 e 16 da zercladur sin il Bürgenstock en la Svizra interna. Ils proxims dis duain vegnir tramess invits a passa 100 stadis.
