Il Cussegl federal planisescha il return da las persunas ch'èn fugidas da la guerra russa en l'Ucraina en Svizra. Quai malgrà ch'ina fin da la guerra n'è anc betg en vista. Il Cussegl federal ha prendì enconuschientscha dad in concept provisoric. El segirescha che quai na saja però nagin pregiudizi per abolir ussa il status «S». Sco quai ch'il Cussegl federal communitgescha sa tracti dad ina planisaziun prospectiva, per ch'ins haja gia in concept, cura che la guerra giaja a fin e las persunas ucranaisas na sajan betg pli periclitadas en lur agen stadi.
Preparaziuns per il temps suenter la guerra
Il status «S» era vegnì activà per in onn il mars da l’onn passà suenter l’invasiun russa en l’Ucraina. El vala uss anc almain enfin l’entschatta dal mars dal 2024, e lubescha da prender si Fugitivs senza stuair ir tras l'entira procedura d'asil. Actualmain vegn il status concedì mo ad Ucranais ed Ucranaisas e lur confamigliars. Cun quest status pon las persunas era lavurar en Svizra e trametter ils uffants en scola. La fin d'avust ha la Confederaziun registrà radund 65'400 persunas cun status «S» en Svizra.
Per il cas che la fin da la guerra saja en vista, èsi previs dad evaluar anc ina giada las mesiras skizzadas en il concept provisoric e da las coordinar cun ils stadis europeics.
