Giuvenils da l'Ucraina ch'han cumenzà in emprendissadi en Svizra pon restar qua enfin ch'els han terminà quel. Er sch'il status da protecziun S vegn abolì avant. Quai ha la ministra da giustia Elisabeth Baume-Schneider decidì suenter avair discurrì cun ils chantuns ed ils partenaris socials.
Radund 5'000 giuvenils da l'Ucraina tranter 15 e 20 onns han survegnì fin uss il status da protecziun S ed han uschia la pussaivladad da cumenzar insacura in emprendissadi. Actualmain frequentan enturn 300 in gimnasi e 1'700 ina purschida per sa preparar per in emprendissadi u ina scola generala.
