Las Viafiers federalas svizras èn daventadas l'unfrenda dad in’attatga da hackers la fin d'emna. Quai ha confermà la SBB envers l’agentura da novitads Keystone-SDA. Tenor quai han nunenconuschents derasà software nuschaivla per e-mail. I saja gartegià ad els d’infiltrar ina part da la rait dal concern. Dentant sajan ni il manaschi da viafier ni datas da clients stads pertutgads. Las mesiras da segirtad digitalas sajan gia vegnidas adattadas, tranter auter haja la direcziun avisà tut las persunas emploiadas da midar lur pled-clav. Entant haja la SBB er fatg ina denunzia penala.
Gia la primavaira 2016 hai dà ina attatga da cyber sin las Viafiers federalas svizras. Lezza giada na saja la pagina d'internet quasi betg stada cuntanschibla per in curt temp. Ils sistems da segirezza dal traffic sin rodaglias na sajan era lura betg stads periclitads.
