La Svizra e l'Italia èn sa cunvegnidas co far pajar taglias cunfinaris che lavuran en il homeoffice. Davent dal 2024 pon cunfinaris e cunfinarias far fin 25% da lur lavur davent da chasa.
La ministra da finanzas svizra Karin Keller-Sutter e ses collega talian Giancarlo Giorgetti han suttascrit ina decleraziun correspundenta. Sch'il cunfin da 25% temp en il homeoffice vegn resguardà, lura resta tut sco fin ussa. Quai tant per il stadi ch'incassescha las taglias sco era per il status dals cunfinaris.
Keller-Sutter ha ludà tenor la communicaziun da medias la cunvegna cuntanschida. La soluziun saja «buna per las interpresas svizras e per lur collavuraturas e collavuraturs». Ella portia clerezza e segirezza en connex cun la taxaziun da homeoffice, «reduceschia la lavur administrativa e garanteschia in tractament egual da tut las cunfinarias e tut ils cunfinaris pertutgads».
