Il Grischun ha tants cunfinaris sco anc mai. L'emprim quartal 2023 ha il Grischun registrà 10'165 persunas che vegnan da l'exteriur a lavurar en il Grischun, rapporta la FMR. Passa la mesadad da quests lavuran en la regiun Malögia – quai surtut en la gastronomia e la hotellaria. En questa branscha èsi era vegnì registrà il pli grond augment en il Grischun.
Ils ultims onns turistics èn stads bumbastics.
Cunzunt destinaziuns cun giasts svizzers hajan profità durant la pandemia, di il schefstatisticher da l'Uffizi per economia e turissem dal Grischun. L'onn passà haja lura profità l'Engiadin'Ota sco destinaziun internaziunala, ch'igl era puspè pussaivel da viagiar libramain. Ils turists da l'exteriur èn turnads. La regiun Malögia profiteschia però era essend uschè datiers da l'Italia, nua ch'ins possia recrutar per la branscha.
Dumber stabil u digren
L'Uffizi per economia e turissem dal Grischun na quinta però betg che quest dumber creschia massiv vinavant. Ins quinta che l'economia sfradentia plitos levamain – e cun quai vegnia era il dumber da cunfinaris a restar stabil u sa reducir.
I dependia però da blers facturs, di Stricker. Las prognosas restian bain bunas. Però pledia plitost per ina leva sminuziun il fatg ch'il turissem haja ussa gist gì oraifer buns onns. Uschia na possian ins betg spetgar records mintg'onn. Da l'autra vart possia per exempel in'inflaziun pli auta en l'UE ch'en Svizra cumpensar quai – u schizunt tuttan laschar crescher las cifras.