Ferma plievgia - Nivels d'aua creschan en Svizra

Ils nivels dals flums svizzers èn creschids danovamain suenter la plievgia intensiva da glindesdi bunura. Era ils nivels dal Lai da Turitg e dal Lai dals Quatter Chantuns, ch’eran dumengia anc sa sbassads, creschian puspè, han las autoritads confermà.

Plinavant ha il traffic da bastiments sin il Rain a Basilea stuì vegnir interrut il glindesdi suentermezdi, scrivan las autoritads. Per il lai da Constanza vala il mument il stgalim da privel 3 considerabel, per la part sut dal lai pudess il privel crescher sin stgalim 4, grond privel. Ils nivels d'aua ils pli auts vegnan spetgads la notg sin mardi. Suenter vegnia la situaziun probablamain a sa calmar.

Pervia da la plievgia intensiva dals dis passads hai dà numerusas inundaziuns e sbuvaditschs en Svizra. Per part èn tschalers vegnids inundads. Pertutgads èn tranter auter ils chantuns Turitg, Son Gagl e Turgovia.

Bovas e vias serradas

Sin il Hirzel en il cantun Turitg è ina bova vegnida giu glindesdi bunura. La via tranter Wädenswil e Sihlbrugg ha stuì vegnir serrada. Blessads n'haja betg dà. La via resta probabel serrada per pliras uras. Tenor SRF Meteo exista era ils proxims dis localmain in privel da bovas.

Era a Brinzauls haja la plievgia procurà per pliras crudadas da crappa. Tenor las autoritads na regia però nagin privel per il vitg, ins appellescha però a la populaziun da respectar las zonas da segirezza. En il Grischun saja la situaziun dentant en general main precara. La raschun saja il cunfin da naiv che saja detg bass, sco l’expert per privels da la natira, Gian Darms, ha declerà envers RTR la sonda. Tuttina ha l'expert recumandà da star davent da flums ed auals che mainan bler'aua e da suandar las recumandaziuns da las autoritads.

Pliras persunas mortas en Germania ed en l'italia

En Germania ed er en l'Italia hai dà inundaziuns, e pliras persunas èn mortas. Ed en Germania resta la situaziun difficila.

En l'Italia èn duas dunnas vegnidas chattadas mortas suenter ch'ellas èn vegnidas tschiffadas d'in flum il venderdi. In'ulteriura persuna è sparida. Ed en Baviera è in pumpier mort tar acziuns da salvament.

En la Germania dal Sid resta la situaziun d’aua gronda tendida il glindesdi. Privel dettia dal Danubi, cunzunt a Regensburg, Straubing e Passau. En 40 lieus na pon scolaras e scolars betg ir a scola, 3'000 persunas èn vegnidas evacuadas e 20'000 gidantras e gidanters èn en acziun.

Tenor il Servetsch tudestg da meteorologia vegni er glindesdi a plover intensivamain en questa regiun. Er pertutgà da las malauras è il bundesland Baden-Württemberg. Il traffic da trens saja ferm restrenschì en l’entir sid dal pajais. Perquai recumonda la Deutsche Bahn d’evitar viadis en questa regiun.

Cunzunt bundesland Baviera pertutgà

In pumpier ch'era en acziun ad Offingen en Baviera n'è anc betg vegnì chattà. La tschertga cuntinueschia, di in pledader da la polizia. L'um da 22 onns è sparì, suenter ch'ina bartga cun tschintg pumpiers è cupitgada la notg sin dumengia.

La medema notg è in pumpier mort durant in'acziun en Baviera. Er sparida è ina dunna a Schrobenhausen. Pervia da la situaziun difficila n'hajan ins anc betg pudì tschertgar ella enfin dumengia saira. I vegn supponì ch'ella è en in tschaler.

La notg passada èn er ad Ebersdorf stadas periclitadas bleras persunas. Las inundaziuns datiers da Stuttgart pertutgian ina zona d'abitar. Er en Baviera èn plirs lieus vegnids evacuads dumengia saira.

Solidaritad da vart dal chancelier tudestg

Il chancelier tudestg Olaf Scholz ha entant empermess solidaritad a las regiuns pertutgadas da las auas grondas en il sid da la Germania. Solidaritad saja quai ch'ins dovria il pli fitg sco uman, ha ditg Scholz a chaschun da sia visita en Baviera. La Germania vegnia a far tut il pussaivel per gidar tant pli svelt las regiuns inundadas.

Ultra da quai ha accentuà Scholz, che la populaziun tudestga stoppia sa metter en pli e pli fitg sin catastrofas da la natira. Cunzunt cun auas grondas saja da quintar pli e pli savens en il futur. I saja quest onn gia la quarta giada ch'el fetschia in viadi en ina regiun inundada. Quai saja in indizi.

La raschun per las inundaziuns è plievgia permanenta. Pliras vischnancas han declerà il stadi da catastrofas. Er rempars èn ruts. Flums ed auals èn ids sur ils cunfins. Pertutgà e cunzunt il bundesland Baviera. Dieschmillis han stuì gidar da pumpar aua or da tschalers e segirar vias cun satgs da sablun.

Or da l'archiv