L'iniziativa per franar ils custs da l'Allianza dal Center ha fatg naufragi. Naufragi ha ella fatg perquai che la maioritad dals chantuns dumbrads ora èn s'exprimids cunter l'iniziativa.
Iniziativa per premias pli bassas
Svizra: Iniziativa per premias pli bassas
-
GEA
927'322 Vuschs
-
NA
1'563'379 Vuschs
Vuschs dals chantuns
- GEA
- Na
Be 37,2% da las votantas e dals votants han vuschà per il frain da custs. Sulettamain dals chantuns Friburg, Giura, Neuchâtel, Tessin ed il Vallais hai dà in Gea per l'iniziativa.
Reacziuns
L'Allianza dal Center, che aveva lantschà questa iniziativa per franar ils custs, èn dischillusa. «Igl è ina schanza manchentada per prender en maun l'origin dal problem e quai fissan stads ils custs», di il cusseglier naziunal da l'AdC Lorenz Hess envers SRF.
I saja fitg grev da persvader la populaziun svizra ch'i dovra in frain da custs, di Martin Candinas, cusseglier naziunal da l'Allianza dal Center. Quai pervia che la glieud tema ch'i dettia restricziuns tar las prestaziuns da las cassas da malsauns. In dals arguments principals ch'il politicher sursilvan menziuna saja che la glieud veglia tut – da tuttas uras – dentant betg propi pajar ils custs effectivs. Ins na veglia simplamain betg ristgar memia bler.
Il Grischun refusa l'iniziativa
Las votantas ed ils votants dal Grischun din Na a l'iniziativa per premias pli bassas. Quai cun ina cumpart da prest 67% da tuttas vuschs dumbradas. La participaziun a la votaziun è stada tar 40%.
9 vischnancas èn s'exprimidas per l'iniziativa. La pli auta participaziun a la votaziun hai cun passa 61% dà a Tschappina. Las pli bleras vuschs cunter l'iniziativa hai dà a Madulain, quai tar ina cumpart da 88% da tuttas votantas e votants. La pli gronda cumpart da vuschs per las premias pli bassas hai cun prest 58% a Schmitten.
L'egliada sin la carta mussa che oravant tut la regiun Moesa è s'exprimì pli pauc cunter l'iniziativa, u ch'ha perfin il pli grond dumber da vischnancas ch'èn per premias pli bassas.
Grischun: Iniziativa per premias pli bassas
Resultat
L'intent da l'iniziativa
L'iniziativa vuleva introducir in frain dals custs. Ella aveva previs ch'il svilup da las pajas e la creschientscha economica prescrivian en il futur quant fitg ch'ils custs da l'assicuranza obligatorica da malsauns dastgan crescher maximalmain.
