Mez matg guarda l'entira Europa a Basilea per l'Eurovision Song Contest 2025. Entamez l'event vegnan er ad esser 14 studentas e students da multimedia da la l'FHGR. Els ed ellas vegnan ad esser responsabels per la producziun, il filmar e la distribuziun da dus events. Ch’els ed ellas han gudagnà questa concurrenza è enconuschent dapi il november – ma be per la gruppa da students e studentas e betg per la publicitad.
Concret han las studentas ed ils students da la FHGR planisà e realisà il «City Handover & Semi-Final Draw» ch'ha gì lieu la fin da schaner, nua ch'igl è vegnì tratg la sort tge naziun che chanta en tgenin dals dus mezfinals. E sco proxim dastgan ellas ed els producir la «Turquoise Carpet & Opening Ceremony», l'avertura uffiziala dal ESC il matg.
Uschia han 14 students e studentas da la FHGR surpiglià la batgetta ed han entaifer var trais mais mess en pe l'emissiun ch'è vegnida emessa en differents chanals da televisiun internaziunals sco era sin youtube. Cunquai ch'els han en lur studi normalmain in entir onn temp da preparaziun per ina tala producziun – ha tut stuì funcziunar sper il studi. Ils students e las studentas han prestà passa 80 dis da lavur. Bain per ina paja – dentant era durant il temp d'examens. Per tuts saja quai dentant in'enorma schanza che sa fetschia la fin finala era fitg bain en il CV.
Las studentas e students han preparà sper la tecnica, la reschia ed il script er plirs videos. Concret han els ed ellas surpiglià las graficas, la reschia, la producziun, ils moniturs, cameras e prompters. L’emissiun principala dal ESC, il final vegn alura producì da las persunas professiunalas.
Tge pajais concurrenzeschan en ils mezfinals?
Tar la show producida da la FHGR ils 28 da schaner ha Malmö surdà il ESC simbolicamain a Basilea. Plinavant è vegnì tratg la sort per ils mezfinals tgi che concurrenzescha in cun l'auter. La Svizra è sco pajais ospitant automaticamain en il final, sco er la Germania, la Frantscha, l'Italia, la Spagna e la Gronda Britannia che tutgan tar ils «Big Five».
Ils pajais che concurrenzeschan al mezfinal ils 13 da matg 2025 a Basilea:
| 1. mesadad da la show | 2. mesadad da la show |
|---|---|
| Slovenia | Albania |
| Ucraina | Aserbaidschan |
| Pologna | Croatia |
| Svezia | Pajais Bass |
| Portugal | Norvegia |
| Islanda | San Marino |
| Cipra |
Ils pajais che concurrenzeschan al mezfinal ils 15 da matg 2025 a Basilea:
| 1. mesadad da la show | 2. mesadad da la show |
|---|---|
| Lituania | Tschechia |
| Armenia | Israel |
| Montenegro | Malta |
| Grezia | Finlanda |
| Irlanda | Danemarc |
| Australia | Luxemburg |
| Lettonia | Georgia |
| Austria | Serbia |