La partida dals verds vul che tut il diever d'electricitad en Svizra vegn en il futur producì cun energia solara. Tetgs, fatschadas ed infrastructuras duain porscher surfatschas per ils indrizs. Cun questa finamira han ils Verds cumenzà a rimnar suttascripziuns per lur iniziativa solara.
Suenter la votaziun davart la lescha d'electricitad da dumengia passada duaja l'iniziativa porscher il proxim pass per la protecziun dal clima e la midada en il sectur da l'energia, ha communitgà la partida. Actualmain nizzegia la Svizra sulettamain in dieschavel dal potenzial da l'energia solara vi da bajetgs ed infrastructuras.
Indrizs solars per mintga edifizi nov
L'iniziativa solara pretenda ch'i vegnia planisà indrizs solars tar mintga edifizi che vegn construì da nov u che vegn renovà. Tenor ils iniziants dettia quai segirezza quai che pertutga il provediment e creeschia plazzas da lavur. Ina giada installà procurian indrizs solars durant decennis per energia favuravla e schubra, argumentscha la partida dals verds.
Ils iniziants pon ussa rimnar suttascripziuns fin ils 11 da december 2025.
