Elecziuns - Scumessas en la Chasa federala

Mesemna vegn decidì sche Albert Rösti u Hans-Ueli Vogt da la Partida populara PPS vegn a suandar ad Ueli Maurer en il Cussegl federal. Da l’autra vart èn Elisabeth Baume-Schneider ed Eva Herzog da la Partida socialdemocratica en la cursa per suandar a Simonetta Sommaruga. En la sessiun d’enviern vegn sper las debattas er discutà tranter parlamentaris e parlamentarias tgi che pudess vegnir elegì. Adina puspè discurran politichers e politicras cun candidats e candidatas – tge ch'els discutan resta ina dumonda. Per survegnir in maletg dals candidats e las candidatas van quels en uschenumnads «hearings» tar mintga partida. Là han els da sa preschentar e dar resposta a las dumondas criticas.

Parlamentaris e parlamentarias Grischunas

Er ils Grischuns e las Grischunas dal Cussegl dals chantuns e dal Cussegl naziunal vegnan ad eleger dus dals candidats e candidatas. Ils parlamentaris e las parlamentarias grischunas na fan tuts e tuttas betg quint cun candidaturas selvadias.

Per parlamentaris e parlamentarias da las autras partidas èsi impurtant dad avair quests hearings. Stefan Engler da l’Allianza dal Center fa dependent sia tscherna da quests discurs. Auter èsi per Magdalena Martullo-Blocher dalla PPS e per Jon Pult e Sandra Locher Benguerel da la PS. Els prendan la decisiun plitost sin basa da quai ch'ins enconuscha gia bain els – e cun quai er lur fermezzas e flaivlezzas. Martullo-Blocher vesa omadus candidats da sia partida sco elegibels. Per Locher Benguerel vegni er grev da sa decider.

Magdalena Martullo-Blocher di, che tuts dus candidats da la PPS sajan buns, uschia che la fin finala na dependia betg tgi che vegn elegì. Auter èsi per ella tar l’elecziun tranter Eva Herzog ed Elisabeth Baume-Schneider.

A tgi ch'ils cussegliers e las cusseglieras Grischunas dattan lur vusch na levan els betg tradir. Ma sch’els avessan da far ina scumessa, senza resguardar lur favurits e favuritas, alura scrivess Anna Giacometti ils nums dad Albert Rösti ed Eva Herzog sin il scrit. Sandra Locher Benguerel avess avant duas emnas er scrit si Eva Herzog ed Albert Rösti. Dentant è la situaziun sa midada ed uschia na saja quai per ella betg pli cler.