La Posta Svizra ha spedì l’onn passà tants pachets sco anc mai – en tut var 202 milliuns pachets. Ils blers da quels – passa 95% – èn arrivads punctualmain, scriva la Posta en ses nov rapport. Uschia haja ella ademplì las perscripziuns legalas.
Questa mesiraziun na resguardia dentant betg il temp dal lockdown l’entschatta da l'onn ed er betg il temp avant Nadal. Quest proceder aveva la cumissiun da posta «Postcom» lubì en vista a la situaziun extraordinaria. Sch’ins avess era resguardà quella quest mais fissan anc radund 94% dals pachets arrivads punctualmain. In purtret sumegliant mussa la distribuziun da brevs. 97% da las brevs posta A e 99,3% da las brevs via posta B èn arrivadas ad uras.
Novas plazzas pervia dad undas da pachets
La Posta quinta er en l'avegnir cun adina dapli pachets, perquai vul ella bajegiar or l'infrastructura cun construir novs centers da pachets. Sper quai duai er infrastructura existenta vegnir modernisada, scriva la Posta. Enfin il 2030 vul il concern dublegiar las capacitads da sortir pachets. Per quai duain vegnir investids 1,5 milliardas francs. Uschia segireschia la Posta plazzas da lavur existentas e stgaffeschia novas, enfin il 2030 radund 1'500 ulteriuras plazzas.
Ord l'archiv
In dals centers da pachets regiunals stat a Vaz Sut, quel è avert dapi il 2020.
