Il december è l’inflaziun sa reducida levet en Svizra – quai per 0,2%. Concret da 3 sin 2,8%, sco quai che l'Uffizi federal da statistica scriva. La media da l’entir onn passà è stada tar 2,8%. Uschia èn ils pretschs per consumentas e consuments pli auts ch'il december passà. En cumparegliaziun internaziunala è la chareschia en Svizra anc bassa. La zona da l'euro registrescha ina chareschia da 10,1% (november) ed ils Stadis Unids han registrà 7,1% (november).
Surmuntà il maximum da 3,5% suenter l'avust
La pli gronda inflaziun è stada registrada l’avust cun 3,5%. Quai è stada la valur la pli auta dapi bunamain 30 onns. Marcant pli chara è vinavant surtut rauba importada. lezza custava il december radund 5,8% dapli che l'onn avant. Tar products interns munta la chareschia ad 1,9%. Ils onns avant muntava la chareschia media annuala a 0,6% (2021), -0,7% (2020) e 0,4% (2019) en Svizra.
