Musica fa ella gia sia entira vita – ma cumenzà a registrar e scriver atgnas chanzuns ha ella fatg l'onn 1998, raquinta Gina Estrada. Ultra da sia lavur sco musicista è ella possessura dal center cultural Cuadro22 e da la butia Etniko.
Dunnas en la musica – pli baud ed oz
Ella sa regorda anc bain da l'entschatta da sia carriera e da la rolla che las dunnas avevan da lez temp.
Jau aveva blers amis ch’eran umens che faschevan musica – e là era quai dal tuttafatg normal che las amias vegnivan a tadlar, dentant n'èn ellas betg vegnidas envidadas da sa participar.
Quai ha ella vulì midar ed ha cumenzà a scriver atgna musica – ed ella n'era betg l'unica. «Igl è bel da vesair co las dunnas fan adina dapli sezzas musica e pon viver lur passiun precis uschia sco ils umens», di Gina Estrada. Fin oz ha la musicista publitgà in album e numerusas chanzuns. Sia musica ei in mix denter electro, tecno e pop. Sia passiun è da star sin tribuna e far shows live.
Inspirada da sia figlia Jamira Estrada, è ella dapi 2 onns era DJane. En quel temp ha ella constatà bleras differenzas tranter umens e dunnas. «I dat bler dapli umens ch'èn DJ's», di ella. «Quai è dentant er uschè, perquai che las dunnas èn vegnidas prendidas seriusas pir bler pli tard sco DJ's.»
Las dunnas hajan er savens da cumbatter cun pregiudizis, per exempel ch'ils umens pensian ch'ellas sajan mo sin tribuna pervia da lur vesair ora. Sco musicista na senta ella dentant betg uschè ferm questas differenzas tranter um e dunna. I saja simplamain impurtant che la musica saja buna.
Helvetiarockt: Promoziun da dunnas e persunas FLINTA
L'uniun Helvetiarockt promova dapi passa 15 onns dunnas e persunas FLINTA che vulan tschiffar pè en la branscha da musica. FLINTA munta: dunnas, persunas inter, nunbinaras, trans ed agender. E promover quellas fa l'uniun cun organisar workshops e scolaziuns en differents lieus en Svizra.
Responsablas per la purschida a Cuira è la chantadura e cumponista rumantscha Chiara Jacomet e la battarista ed arranschadra da Cuira Momo Kawazoe. Ellas duas èn in mussament che la promoziun da dunnas en la branscha da musica po purtar fritg: Avant intgins onns han ellas emprendì d'enconuscher ina l'autra grazia a Helvetiarockt e fan ussa communablamain musica cun lur band «ladunna».
Ord l'archiv:
Studi mussa la sutrepreschentaziun
Che dunnas e persunas FLINTA èn anc adina sutrepreschentadas en la scena da musica, mussa in studi da l'Universitad da Basilea da l'onn 2021: 91% da las persunas che stattan sin tribuna e fan musica da rock e pop èn umens. El jazz èn quai 88%.
I saja impurtant che la glieud na vesi betg mo umens vid la battaria ed il bass, di Momo Kawazoe. Era sch'ella sezza n'ha betg tschertgà in idol feminin cura ch'ella ha cumenzà a sunar la battaria, manegia ella che gist quels manchian.
E Chiara Jacomet manegia ch'era persunas renumadas hajan ina grond'influenza quai che pertutgia la visibladad da musicistas:
Sco l'icona da pop Harry Styles che ha ina band che consista per 90% da dunnas. Da quellas persunas han in'enorma forza.
Dapi dus onns maina il duo il workshop per bands da Helvetiarockt a Cuira. Persunas tranter 14-25 onns pon emprender cun agid da las duas musicistas professiunalas da chantar e sunar en ina band. I n'emporta betg sch'ellas han gia experientscha musicala u betg. Quest onn èn Luka Hlavinka e Michelle Wiederseiner s’annunziads ed han gì passa diesch emprovas e trais concerts cun lur nova band.
Cun ina interfatscha speziala per quella ura cuntanscha RTR ultra da quai era il club dal radio interactiv e ta pussibilitescha d’emetter live tes songs svizzers preferids. Qua en il studio virtual has ti la pussaivladad da selecziunar fin 4 titels che van lura sur l'emettur. Ti ès vi dal pult da mixagi, giauda tia DJ-ada!
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Novas modas e manieras da far musica
Michelle Wiederseiner ha emprendì d’accumpagnar sia vusch cun il synthesizer ed il pad – in instrument electronic cun il qual ins po sunar beats. E Luka Hlavinka che sunava oriundamain ghitarra, ha grazia al workshop emprendì da sunar il keyboard. Insumma sajan ellas vegnidas animadas d'experimentar cun instruments ch'eran enfin lura anc esters ad ellas:
Sch'ins gughegia d'empruvar chaussas novas vesan ins era il svilup ch'ins fa.
E malgrà ch'il workshop è gia passà, il plaschair per la musica resta. Uschia vulan Luka Hlavinka sco era Michelle Wiederseiner cuntinuar da chantar ed era emprender novs instruments.