Workshop da DJ - Maschadar chanzuns e tuns sco ils profis

Sch'il sulegl na smatgass betg tras las travs dal Cuadro22, pudess ins crair ch'ins sa chattia en sortida amez la notg. Persunas sesan sin sutgas giaglias u stattan sper la bar, cun ina biera enta maun. Vi dal palantschieu sura pendan flurs da plastic e vi da las paraids pendan uschè blers maletgs e figuras, ch’ins vesa adina insatge nov, tuttina nua ch’ins guarda.

Ma – i n'è betg notg e nagin n'è qua en sortida. La glieud è numnadamain sa radunada qua per in workshop da DJ dal giuven teater grischun.

Enavos a l'entschatta

Lain ir in pèr uras enavos. Igl è la damaun a las 10:30, e duas dJanes spetgan en il center da cultura Cuadro22 – Gina e Jamira Estrada, mamma e figlia. La mamma Gina Estrada raquinta, ch'ellas hajan svelt vendì ora il curs.

«Igl è bel da vesair quant grond che l'interess è», di ella. Ella n’haja betg spetgà ch’il curs saja uschè svelt vendì or – ma i fa grond plaschair ad ella.

La sala s'emplaina pli e pli cun diversa glieud – in um grond cun crutschas, ina giuvna cun rollas nairas e lefs cotschens ed in pèrin che dat maun, per numnar intgins. Ils blers n'han anc insumma nagina experientscha, co els raquintan. «Jau hai adina be sautà tar la musica, ma sezza n'hai jau anc mai empruvà ora quai», di ina giuvna. «Jau na sai betg co ch'i va – ma jau hai gust d'emprender quai», di in'autra.

Ils chavels nairs da Jamira Estrada èn in cuntrast tar ils chavels clers da sia mamma, ma en fatscha sa sumeglian ellas fitg. Ellas stattan in sper l'autra e surrian en la runda – ins bada che tuttas duas han grond plaschair.

Ellas beneventan tuts e tanschan lura il microfon tras la runda, per che mintgina possia s'introducir. Suenter la runda da preschentaziun cumenzan ellas cun ina part teoretica – tge applicaziun ch'è la pli ideala, cun tge programs ch'ins maschaida il meglier musica e da tge paginas ch'ins po telechargiar gratuitamain musica.

Gist uschè cler na pari a blers e bleras anc betg dad esser suenter in'ura. Ins senta che las duas musicistas san exact da tge ch'ellas discurran – mintgatant èsi difficil d'als pudair suandar.

Empruvar seza

Cura che Jamira e Gina Estrada proponan dad ir tar la part pratica, paran bleras e blers dad esser levgiads. Ellas mainan la gruppa en in segund local, vinavant davos en il Cuadro22, nua ch'igl ha ina gronda maisa cun in DJ-set. A l'emprima egliada ves'ins blers buttuns e spurtegls en tut las colurs e grondezzas. Sisum il DJ-set hai in pitschen visur e sin tuttas duas varts dal set stat in grammofon.

Jamira Estrada declera tge effect che tge buttun e tge regulatur ha. Tuts e tuttas taidlan plain mirveglias ed emprovan da tegnair endament tut quai che la giuvna di. Jamira metta si ils uregliers – uschia che mo in auditur cuvra in'ureglia.

Durant raquintar lascha ella ir per l'emprima giada il tun dil stil da musica «House». La fascinaziun dals participants e da las participantas è immensa. Quai na fa dentant betg surstar la giuvna DJane.

Cun in rir agiunta ella, ch'ella planiseschia gia il proxim workshop.

Insacura dastgan las participantas ed ils participants empruvar sezs. Per blers è quai l'emprima giada ch'ellas maschaidan sezzas la musica.

Fin la saira na sa mida il program lura betg pli – tuts dastgan duvrar libramain il DJ-set. La musica ed ils tuns emplainan tut il local. E tgi sa – forsa udis in dals 14 participants e participantas a la proxima party en il Cuadro22 a Cuira.

Or da l'archiv:

Era il musicist engiadinais Domenic Janett – che suna per ordinari ils «Fränzlis da Tschlin» la clarinetta u il saxofon – ha tras ses figl Gian Andri Janett tschiffà plaschair vi da la musica da party. Gian Andri Janett ch'è DJ ha pudì persvader ses bab da far ensemen musica – el sco DJ e ses bab cun il saxofon. Quest'idea ha chattà grond resun a Berna nua ch'il duo da bab e figl han presentà ad ina festa da students quai unic mix musical: