Igl è ina pitschna revoluziun en la producziun da chaschiel, tant dal punct da vista professiunal sco er dal gust anora, ed ella pudess purtar fritg en tschalers da madiraziun. La taila ch'è vegnida patentada l'onn passà in sis pajais da l'Europa e che vegn da preschent patentada en tut il mund, vegn duvrada per zugliar en la magnuccas che vegnan or dal bogn da sal curt avant dad ir en la fasa da madiraziun.Questa nova tecnica po vegnir applitgada per chaschiel dir (p.ex. Gruyère Emmentaler u Sbrinz) e per chaschiel mez dir (raclette, Tilsiter, Vacherin fribourgeois u Appenzeller).
Il volver e sfruschar magnuccas ina chaussa dal passà?
Il recept resta natiralmain in secret, ma ils avantatgs èn empermettents. Per ils signuns è la madiraziun pli svelta ed igl n'è betg pli necessari da volver e sfruschar las magnuccas mintga di. Ins las sto be far in zich umid da temp en temp ed agiunscher las bacterias ed il levon specific per la sort.Ultra da quai èsi cun la midada dal clima pli e pli difficil da mantegnair la temperatura e l'umiditad da l'aria en il tschaler. Questa taila pudess pia gidar a mitigiar quest problem.Las magnuccas sezzas han ina consistenza pli rodunda ed in aroma pli intensiv, essend che la taila mantegna l'umiditad entaifer la magnucca. La crusta («la morge», en il jargon spezialisà) che contribuescha al gust dal chaschiel sa sviluppa tant sin il chaschiel sco era sin la taila. Ella è damai pli satiglia, quai che po esser in avantatg per tschertas sorts da chaschiel.
Incumpatibel cun AOP?
Tenor in artitgel da Terre&Nature èn 13 chascharias da differenta grondezza sa decleradas prontas da far tests cun la metoda. Il mument vegn anc pachetà en a maun, ma ils inventaders lavuran cun fidanza en ils avantatgs da lur metoda gia vi dal svilup d'ina maschina d'emballadi.Quai pudess dentant chaschunar problems, spezialmain en vista a la cumpatibilitad cun las prescripziuns actualas per la producziun da denominaziuns d'origin protegidas (AOP). Spezialmain la federaziun da branscha Gruyère refusescha quai.
