La Svizra vegn numnada chastè d'aua da l'Europa surtut pervia d'ina cifra: Era sche la Svizra ha mo 0.4 % dal territori da l'Europa, dispona ella da 6 % da las reservas d'aua dultscha dal continent. Mintg'onn plovi en Svizra quasi il dubel da la media europeica. E cun nossa situaziun geografica vegn ina part da l'aua accumulada ad interim sco glatsch u naiv.
Damain naiv e glatsch
E lura va l'aua svizra directamain en quatter flums europeics: il Rain, il Rodan, il Po ed il Danubi, pia bain «il chastè d'aua da l'Europa».
«L'aua è per il turissem, per la producziun d'energia, per l'industria, per las chasadas, per la flora e fauna, atgnamain tut quai che pertutga in chantun u in pajais», punctuescha Laurent Horvath, incumbensà d'aua dal chantun Vallais e l'emprim «Mr. Aua» dal pajais. Sia incumbensa è da coordinar tut las activitads areguard l'aua en ses chantun. «En il Vallais èn las vischnancas possessuras da l'aua», punctuescha el, «perquai stuain nus chattar soluziuns en vista a las midadas actualas».