La Svizra haja bunas premissas da profitar da la digitalisaziun, di la cussegliera federala Doris Leuthard a chaschun da ses pled d'avertura da la dieta «Svizra digitala». La Confederaziun saja il pajais il pli cumpetitiv dal mund, las scolas autas hajan in bun renum e l'economia saja sauna ed innovativa. Malgrà quai procuria il pled 'digitalisaziun' tar blers per temas e malruaus. Ella chapeschia quai.
Gea, la digitalisaziun mida la moda e maniera co che nus vivain, emprendain e lavurain. Ma nus na pudain betg guntgir ella. Nus stuain avair dapli gust d’experimentar ed esser pli averts.
En quest connex saja perquai impurtant da sclerir la rolla ch'il stadi stoppia avair, ha Leuthard ditg vinavant. Cler saja per ella, che tuts duain avair las medemas schanzas da pudair profitar da la digitalisaziun, da pudair realisar lur ideas e visiuns. Il stadi duaja stgaffir pussaivladads e motivar, per ch’i dettia in svilup.
Estonia sco exempel
Gia dapi 20 onns sin la via da la digitalisaziun è l'Estonia. Il pajais en il nordost da l'Europa, circa medem grond sco la Svizra, dentant populà da strusch 1,4 milliuns persunas, ha suenter sia independenza da l'Uniun Sovietica nizzegià la chaschun ed ha digitalisà l'entira administraziun. Oz posseda mintga avdant in'identitad digitala per suttascriver contracts ed era per votar a moda electronica.
L'entir sistem saja fitg segir, e perquai haja la populaziun era la confidenza necessaria e dovria ils servetschs, di Taavi Kotka ch'era enfin dacurt responsabel per la digitalisaziun da l'administraziun da l'Estonia. Era la Svizra possia cuntanscher quai, ma ella stoppia far quai en sia moda e maniera. Impurtant saja d’infurmar bain la populaziun.
I dovra temp e daners per declerar a la populaziun da tge ch’i sa tracta. Quai para d'esser ina lavur da Sisifus, ma la fin renda quai.
La Svizra na dastgia dentant betg targlinar, di Kotka. Il svilup giaja adina vinavant e tuttenina hajan tut tschels surpassà nus.
Svizra sin buna via
Che la Svizra na vegnia betg a manchentar il tren crai cussegliera federala Doris Leuthard. Mintgatant sa dasdia la Svizra in zic tard, ma sch’ella saja sa dasdada, lura saja ella sperta e surpassa autras naziuns. Dar schlantsch vul la Confederaziun per exempel cun intensivar il barat tranter las gruppas d'interess u cun projects sco l'identitad digitala, lantschada l’emna passada.
RR actualitad 17:00