Tar l'occurenza ha Sommaruga ditg ch'ella saja impressiunada quant constructiv che la populaziun va enturn cun la decisiun da la Nagra. Ella portia ina chargia per l'entira Svizra. Datiers da Lägern duain ils ruments radioactivs svizzers vegnir deponids. Geologs da la Nagra, la Societad naziunala per il deposit da ruments radioactivs, han decidì ch'il lieu saja il meglier per quai.
Tar l'occurrenza a Glattfelden èsi vegnì tschentà bleras dumondas. Sche l'aua sutterrana saja protegida avunda dals ruments radioactivs, e quant bler indemnisaziun finanziala che la populaziun vegnia a survegnir, vuleva la glieud savair.
Tscherts restan sceptics
Betg tut las abitantas ed abitants da las vischnancas pertutgadas èn persvas che Lägern è vairamain la meglra schelta per il deposit. Avant che Sommaruga ha pudì tegnair il pled ha ella survegnì ina brev da la populaziun cun 400 suttascripziuns. Quella pretenda che la schelta da la Nagra vegn intercurida d'ina cumissiun independenta.
