Il Cussegl federal ha decis da rinforzar las mesiras per cumbatter il coronavirus.
- Tut las scolas en Svizra vegnan serradas enfin ils 4 d’avrigl - saja scolas primaras, scolas autas etc.
- Occurrenzas cun passa 100 persunas èn scumandadas enfin ils 30 d'avrigl
- En restaurants, bars e discotecas na dastgan be dapli che 50 persunas sa rimnar.
- L’entrada davent da l’Italia en Svizra vegn restrenschida.
- Sco agid immediat metta il Cussegl federal a disposiziun 10 milliardas francs per l’economia.
Per restrenscher ch’il virus sa derasia pli fitg, ston tuttas persunas tegnair distanza ina da l’autra. Il Cussegl federal ha per quest intent decis pliras mesiras. Il nov decret vala cun e tochen ils 30 d’avrigl. La finamira èsi da proteger persunas pli veglias e persunas cun malsognas preexistentas. Plinavant duai vegnir evità ch’ils ospitals vegnian surchargiads.
Betg cler sche la sessiun cuntinuescha
Sche la sessiun dal parlament federal po cuntinuar l'emna proxima en Chasa Federala n'è anc betg cler. Cusseglier federal Alain Berset ha declerà ch'il scumond d'occurenzas a partir da 100 persunas na valia betg per «biros gronds».
Cunquai ch'il parlament na saja betg ina occurenza plublica, na saja la sessiun betg pertutgada direct dal scumond. La finala decidia il parlament sch'ins possia cuntinuar la sessiun. Betg cler è anc, schebain las votaziuns dal matg vegnan ad esser.
