Dapi gievgia a mezdi hai dà 194 confermas novas. Quai munta ch'il dumber da persunas cun il coronavirus è s'augmentà sin 1009. Quai ha confermà l'Uffizi federal da sanadad mesemna a mezdi. Tar 116 ulteriuras persunas manca anc la conferma dal segund test.
Tenor il BAG hai fin ussa cas da corona en 24 chantuns da la Svizra ed er en il Principadi da Liechtenstein. Cun distanza ils pli blers cas ha fin uss il Tessin cun 215 cas da corona confermads. En Grischun ha il chantun il venderdi suentermezdi confermà 43 cas da corona.
52% dals malsauns èn umens, 48% dunnas. La vegliadetgna mediana è tar 49 onns. Quai munta che la mesadad dals malsauns èn pli giuvens e tschella mesadad pli veglia. A l'entschatta da l'emna dumbrava la Svizra en total anc 281 cas.
En il chantun Vad èn duas ulteriuras persunas mortas en connex cun il virus. Co il chantun ha communitgà sa tracti tar unfrendas da dus umens sur 80 onns. Omaduas persunas sajan mortas la notg sin venderdis. Il dumber da persunas ch'èn mortas pervia dal coronavirus crescha sin 9. Mintgamai trais persunas èn mortas en il Vad ed il Tessin, duas a Basilea-Champagna ed ina a Basilea-Citad.
RTR novitads 14:00
