Il Cussegl federal vul sustegnair finanzialmain la branscha d'electricitad svizra. Perquai preschenta el al parlament ina lescha urgenta che duai lubir quai. Quest fond d’urgenza prevesa sustegn da fin 10 milliardas francs ch’ils furniders d’electricitad relevants per il sistem pon retrair. Daners duai però be dar en situaziuns extremas, pir sche tuttas autras alternativas èn vegnidas utilisadas. Uschia vul il Cussegl federal segirar il provediment d’electricitad, er sch’i dat pretschs volatils.
En in cas da mancanza da liquiditad dovria spert la liquiditad necessaria, uschia Simonetta Sommaruga. Avant che la Confederaziun siglia en stoppian ils chantuns e vischnancas daventar activs. Perquai ch'ils chantuns na possian a curta vista betg metter a disposiziun la liquiditad necessaria reageschia la Confederaziun uschia en il mender scenari. E quai vulan ins cuntanscher e cun stgaffir ina ina basa legala en chaussa.
La lescha duai esser limitada fin il 2026. Il parlament vegn probabel a tractar la proposta en la sessiun da stad.
Suttascriver contract avant che votar
Il Cussegl federal vul suttascriver la cunvegna per cumprar l'aviun da cumbat F-35 avant ch'il pievel ha decis davart l'iniziativa per franar la cumpra. Pervi da la situaziun da segirezza enturn la guerra en l'Ucraina vul il Cussegl federal sustegnair dumondas en quest connex en il parlament. L'offerta dal producent dals aviuns Lockheed Martin perdia proxima primavaira sia valaivladad ed i na saja betg cler sche la Svizra survegnia ils aviuns per il pretsch offert e sch'i vegnia resguardà termins sch'ins suttascrivia pli tard.
Reserva da gas
La Svizra vul far ina reserva da gas per il proxim enviern, per cas che la Russia interumpess las furniziuns pervi da la guerra en l'Ucraina. Il Cussegl federal oblighescha la branscha da garantir tar ils pajais vischins capacitads da magazin ed opziuns per ulteriuras furniziuns da gas. Quest concept ha elavurà ina task force da la branscha da gas ensemen cun plirs uffizis federals.
Chantuns responsabels per cumbatter corona l'atun
Sche las cifras da Covid-19 creschan puspè a moda rasanta l'atun èn ils chantuns e betg la Confederaziun responsabels per mesiras e da coordinar quellas. Malgrà la critica en la consultaziun sa tegna il Cussegl federal vi da questa decisiun da principi. Ils chantuns sajan abels da dumagnar svilups epidemiologics cun las structuras existentas, è l'argumentaziun. La Confederaziun vegnia be ad intervegnir sche las stentas dals chantuns na bastan betg per evitar ina derasaziun dal virus e sch'i smanascha in privel per la sanadad publica.
Il Cussegl scientific da la Svizra ha analisà il managment da crisa durant la pandemia da corona. El drizza perquai pliras cussegliaziuns a las autoritads e la scienzia. Tenor quellas duain las autoritads communitgar pli avert e transparent tar ina crisa futura. Plinavant duain persunas cun ina biografia da migraziun vegnir infurmadas meglier. Las autoritads stoppian ultra da quai sa basar sin las datas che stattan a disposiziun per trair decisiuns. Latiers sto il managment da datas naziunal vegnir accellerà e chantuns e Confeeraziun stoppian collavurar meglier.
Controllar effects dal clima sin las auas
Las consequenzas da la midada dal clima sin las auas svizras duain vegnir controlladas meglier. Quai vul il Cussegl federal. Da nov vul el obligar ils chantuns da rapportar en cas da setgira.
Plinavant duian els en l’avegnir rapportar quant bleras lubientschas excepziunalas ch’els dattan a l’agricultura per duvrar l'aua ord flums e lais, sche las reservas minimalas d’aua restantas vegnian sutpassadas en cas d’urgenza. En pli recumonda il Cussegl federal als chantuns da mesirar pli detaglià il consum d’aua actual.
Avertir da setgiras
Er ha il Cussegl federal incumbensà ils uffizis federals d'ambient, da metereologia e climatologia sco er l'Uffizi federal da topografia da sviluppar aifer ils proxims dus onns in sistem da preavertiment per setgiras. Quel sistem duai pudair dir gia pliras emnas ordavant sch'i s'avischinescha ina situaziun critica. A partir dal 2025 duain las infurmaziuns star a disposiziun a la populaziun. Ils custs totals per la furmaziun dal sistem da preavertiment calculescha il Cussegl federal sin 4,75 milliuns francs.
Uffizi per segirtad da cyber
En vista a l'impurtanza da la segirtad digitala vul il Cussegl federal stgaffir in agen uffizi federal che s'occupa da questa tematica. Fin la fin da l'onn duai il Departament federal da finanzas far ina proposta co che l'uffizi po vegnir sviluppà. Actualmain sa fatschentan radund 40 collavuraturas e collavuraturs en il Center naziunal per segirezza digitala cun la segirtad svizra cunter attatgas da cyber.