Il Cussegl naziunal propona da refusar l'iniziativa da l'Allianza dal Center cun il num «Per premias pli bassas – in frain da custs per il sectur da sanadad». Il resultat final è stà cler cun 156 cunter 28 vuschs.
E tuttina: L'intent general ha chattà sustegn tar las parlamentarias ed ils parlamentaris: La Svizra stoppia franar ils custs da sanadad e las premias per las cassas da malsauns. Mo la dumonda co far quai è stada dispitaivla ed ha dà bler da discutar ils ultims dus dis.
Iniziativa vs. cuntraproposta
L'iniziativa da l'Allianza dal Center pretenda che Confederaziun e chantuns ston intervegnir sch'ils custs da sanadad creschan memia fitg cumpareglià cun la paja. La formulaziun «memia fitg» munta tenor il text da l'iniziativa: Sche las premias creschan pro persuna assicurada per in tschintgavel sur il svilup da la paja nominala.
Cun excepziun da l'Allianza dal Center èn las ulteriuras partidas dentant sa mussadas scepticas durant la debatta. Il frain da custs che na resguardia ni il svilup tecnic ni che la populaziun vegnia adina pli veglia, saja privlus. Er il Cussegl federal era s'exprimì cunter l'iniziativa.
Cun la cuntraproposta duai il Cussegl federal fixar finamiras per custs e qualitad per mintgamai quatter onns – quai suenter avair fatg ina discussiun cun tut ils acturs pertutgads. Mintga chantun po s'orientar vi da questas finamiras e medemamain fixar atgnas finamiras.
Iniziativa e cuntraproposta van uss anc en il Cussegl dals chantuns.
Cunquai n'èn las discussiuns enturn las premias per las cassas da malsauns dentant anc betg a fin. En la terza emna da la sessiun da stad vegn discutada l'iniziativa da premias da la Partida socialdemocratica.