La cifra exacta n'enconuscha la ministra da finanzas dentant betg. Quella saja enconuschenta a la Banca naziunala. Ils daners haja la Credit Suisse duvrà, perquai che la clientella haja vinavant transferì daners e perquai che autras bancas hajan pretendì garanzias.
50 milliardas dapli
La cussegliera federala è plinavant s'exprimida davart las 50 milliardas francs emblidadas, menziunadas en in rapport da las gasettas da CH Media la sonda. Tenor quest rapport duai il ristg total muntar a 259 milliardas francs, e betg mo a 209 milliardas. La dumengia passada hajan ins sulettamain discurrì da las garanzias per la Credit Suisse.
La Confederaziun garantescha envers la Banca naziunala svizra ils emprests da liquiditad a las bancas, ha Karin Keller-Sutter explitgà.
Sclerir tge ch'è capità
La cussegliera federala è s'exprimida per dar in sguard pli critic sin tut quai ch'è succedì. Ella haja gia dà l'emna passada incumbensà il professer da bancas Manuel Ammann da l'Universitad da Son Gagl da far ina analisa. Vitiers pondereschia ella da sezza far ina tala dumonda, tar la sessiun extraordinaria dal parlament che vegnia – ha Karin Keller-Sutter ditg en la «Samstagsrundschau». Ella è dentant s'exprimida cunter ina cumissiun parlamentara d'inquisiziun PUK.
