En la gronda part da la Svizra vegnan las abitaziuns adina pli stgartas – betg mo en citads grondas sco Turitg e Genevra, mabain er en las aglomeraziuns. Quai resorta dal monitoring d'immobiglias da l'interpresa Wüestpartner.
La raschun: Dapi l'entschatta da l'onn vegnan adina damain abitaziuns sin fiera. En il medem mument crescha la dumonda perquai ch'adina dapli persunas bain qualifitgadas da l'exteriur vegnan en Svizra a star. Plinavant creschan ils custs da construcziun, quai haja per consequenza ch'i vegni bajegià damain chasas e proprietads da condomini. E cunquai tschessa la purschida d'abitaziuns, ed ils tschains per abitaziuns novas creschan.
Per ina nov'abitaziun pajan ins a Genevra e Turitg en media 1,2 pertschient dapli tschains ch'avant in onn. I dat dentant era excepziuns: A Basilea ed en las regiuns alpinas èn ils tschains d'abitar tschessads cumpareglià cun avant in onn, sco l'interpresa da cussegliaziun FPRE ha eruì.
