I creschan e creschan e creschan: ils custs da sanadad ed uschia era las premias per las cassas da malsauns. Per bleras chasadas in import che ha grond'influenza sin la bursa. Gia dapi onns emprova la politica da chattar soluziuns per franar quel svilup, ma i na vul betg propi funcziunar. En questa sessiun da stad vegnan discutadas duas iniziativas cun intent da sbassar ils custs: ina da l'Allianza dal center ed ina da la Partida socialdemocratica. Dentant tgi ha tge soluziun?
Iniziativa per franar ils custs da sanadad
Ils custs da sanadad na dastgan betg crescher pli fitg co la chareschia e las pajas, di il politicher da l’Allianza dal Center (ADC) Martin Candinas. E precis quai vul l’iniziativa da l’ADC evitar. Sche ils custs da sanadad creschan sur 20% dapli che las pajais e l’economia duain chantuns e confederaziuns far mesiras. Dentant tge mesiras n’èn anc betg definì cleramain. Il Cussegl naziunal ha debattà sur da l’iniziativa e refusà quella. El ha dentant acceptà ina cuntraproposta indirecta dal Cussegl federal.
Iniziativa per premias bassas
Las premias na duain betg esser dapli che 10% da las entradas dad ina chasada. Quai vul la Partida socialdemocratica (PS). Nua che quai na tanscha betg duain Confederaziun e chantuns sustegnair cun reducziuns da premias. Era sche quai porta custs supplementars per il stadi cun sai è la politicra grischuna Sandra Locher-Benguerel persvasa da l’iniziativa. Ins stoppia far tut il pussaivel per reducir ils custs da sanadad e finalmain las premias per las chasadas. Ella vesess sco buna soluziun ina cumbinaziun da lur iniziativa e da quella da l’ADC. Mesemna suentermezdi debattescha la chombra gronda en ina prima runda davart l'iniziativa. La debatta cuntinuescha gievgia.
Pli pauc stadi e pli blera atgna responsabladad
Betg cuntenta cun ina u l’autra proposta da las iniziativas è la partida populara svizra. Mintgin duai surpigliar responsabladad, di la Cussegliera naziunala Magdalena Martullo-Blocher. Ella vesa oravant tut in problem da manar en il departament da sanadad. Mintgin en il sectur da sanadad stoppia vegnir avisà da prestar sia atgna cumpart, di Martullo-Blocher. La partida populara svizra vul dapli atgna responsabladad era da las singulas persunas che van tar il medi.