Custs da sanadad - Ambulant avant staziunar – Gea a la finanziaziun unitara

Svizras e Svizzers vulan ina finanziaziun unitara da las prestaziuns da sanadad. 53,3% da las votantas e dals votants svizzers han acceptà la midada da la lescha federala davart las assicuranzas da malsauns. Svizzers e Svizras suondan uschia pia la proposta dal Cussegl federal e dal parlament. Unida n'è la Svizra però era tar quest project betg. Entant che las vuschs per la finanziaziun unitara da las prestaziuns da sanadad vegnan dals chantuns da la Svizra tudestga e dal Tessin, refusan ils chantuns romands ella. Il pli cler Na hai dà en ils chantuns Genevra e Neuchâtel cun passa 65% da las vuschs. La participaziun a la votaziun è stada tar radund 45%.

Il Gea mussa che refurmas èn pussaivlas

Il Gea per la finanziaziun unitara da tut las prestaziuns da sanadad è per la cussegliera federala Elisabeth Baume-Schneider in pass da refurma impurtant. En il sectur da sanadad dovria però ulteriuras refurmas, ha ella ditg a Berna davant las medias. La finanziaziun unifitgada da tractaments ambulants e staziunars sco er da la tgira da lunga durada vegnia da bun a pazients, ma er als assicurads, ha ditg la ministra da sanadad. E la decisiun gidia da frenar l'augment da las premias da las cassas da malsauns.

Ils represchentants da la campagna per la finanziaziun unitara da las prestaziuns da sanadad èn cuntents suenter il Gea al project. Il Gea mussia che refurmas en il sectur da sanadad sajan pussaivlas en Svizra. Il princip «ambulant avant staziunar» spargnia tut en tut daners, scrivan ils aderents en ina communicaziun.

L'uniun naziunala dals ospitals H+ è medemamain satisfatga dal resultat davart la finanziaziun unitara da las prestaziuns da sanadad. Questa decisiun creeschia la basa per in sistem da sanadad orientà vers il futur e favuraivel, scriva l'uniun. Per ils ospitals saja questa refurma decisiva per far avanzar tractaments ambulants che fetschian senn ord vista medicinala. La refurma eliminieschia fauss impuls ch'i dettia acualmain. Grazia al resultat da la votaziun possian ins prender en mira la qualitad sco finamira communabla da tuts.

L'uniun da las cassas da malsauns Curafutura discurra d'in «Gea istoric». Il Gea saja ina victoria per il sistem da sanadad, pazientas e pazients ed ils pajaders da premias, uschia Curafutura. La refurma rinforzia il provediment da sanadad. En pli pussibiliteschia ella da spargnar tar medema qualitad per pazientas e pazients e distgargia a moda evidenta ils pajaders e las pajadras da premias. Curafutura è l'uniun da las cassas da malsauns CSS, Helsana e Sanitas.

Adversaris da la fatschenta averteschan da premias anc pli autas

Entant ch'ils aderents da la fatschenta discurran d'in Gea istoric, averteschan ils adversaris da las consequenzas. Ins stoppia quintar cun premias pli autas e squitsch sin la qualitad da la tgira ed il persunal, scriva l'Uniun sindicala svizra. Ils aderents ed il Cussegl federal hajan fatg empermischuns en il cumbat electoral, las qualas la refurma na possia betg ademplir. Perquai che la tgira da lunga durada vegnia cumpigliada en il futur stoppian assicuradas ed assicurads vegnir protegids da chargias supplementaras entras premias pli autas ed agens custs.

Cler Gea da Grischunas e Grischuns

Votantas e votants grischuns acceptan a moda pli clera la finanziaziun unitara da las prestaziuns da sanadad. Suenter che tut las vischnancas han dumbrà las vuschs inoltradas sa mussa in cler Gea. 59,6% da las votantas e dals votants approveschan il project, 40,4% refusan el.

Grischunas e Grischuns èn pia era suandads la proposta dal Cussegl federal e dal parlament. En tut èn radund 39% da las persunas cun dretg da vuschar idas a l'urna en il Grischun.

Il pli cler Gea a la finanziaziun unitara da las prestaziuns da sanadad hai dà en la vischnanca da Furna cun 80% da las vuschs. Tschappina, Val, Segl, Puntraschigna e Medel han ditg Gea cun pauc sur 70% da las vuschs. Il pli cler Na hai dà a Ferrera cun 59% da las vuschs.

Per tge vai?

En Svizra na vegnan las prestaziuns ch'èn cuvridas da l'assicuranza obligatorica da malsauns betg finanziadas a moda unitara. En cas da tractaments ambulants (p.ex. tractament medi da chasa) paja la cassa da malsauns. En cas da tractaments staziunars (ospital cun pernottaziun) surpiglia il chantun almain 55% dals custs. En cas da prestaziuns da tgira a chasa u en ina chasa da tgira surpiglia il chantun stgars la mesadad dals custs. Il rest surpiglia mintgamai la cassa da malsauns. Quai procuria per fauss impuls: Pazientas e pazients vegnan magari tractads staziunarmain malgrà ch'i fiss pli raschunaivel per motivs medicinals e da custs da far in tractament ambulant. Cun midar la lescha ha il parlament decis che tut las prestaziuns da l'assicuranza obligatorica da malsauns vegnan finanziads cuminaivlamain da las cassas da malsauns e dals chantuns tenor la medema clav da repartiziun.