Il Cussegl naziunal vul esser preparà per ina proxima unda da Covid-19. Perquai ha el decis cun 140 cunter 47 vuschs da prolungar singulas ordinaziuns da la lescha Covid-19.
Confederaziun duai pajar vinavant ils tests
Il Cussegl federal vuleva ch'ils chantuns surpiglian ils custs per ils tests a partir da l'avrigl 2023 - enstagl da la Confederaziun. Il minister da la sanadad Alain Berset ha ditg en la debatta che la Confederaziun haja fin uss surpiglià la gronda part dals custs da la pandemia e che la finanziaziun dals tests entras ils chantuns correspundia a la repartiziun da las incumbensas ordinarias Ils chantuns èn sa dustads cunter questa proposta, els teman custs da plirs tschient milliuns francs.
Il Cussegl naziunal ha ussa decis cun 136 cunter 55 che la Confederaziun duai finanziar vinavant ils tests.
Tar las capitads da letgs en ospitals duain il chantuns dentant surpigliar dapli responsabladad. Els duain garantir avunda reservas per chargias maximalas chaschunadas da la pandemia. Ils chantuns duain far cunvegnientschas finanzialas en cas ch'els tractan pazients e pazientas extrachantunals. La PPS era cunter questas reglas, ella ha dentant pers la votaziun cun 78 cunter 112 vusch.
Bleras mesiras restan
En pli vul il Cussegl naziunal che tschertas mesiras per cumbatter la pandemia or da la lescha da Covid-19 restan:
- La Confederaziun duai vinavant avair il dretg d’edir ils certificats e l’app Swiss-Covid
- La Confederaziun ha la cumpetenza da sustegnair il svilup da medicaments cunter Covid-19
- Las disposiziuns per proteger persunas spezialmain periclitadas
- Mesiras sco serrar cunfins u reglas da viadi per frontaliers e frontalieras
La maioritad dal Cussegl naziunal ha vulì prolungar tut questas mesiras fin la mesadad da l'onn 2024. La PPS e la PLD eran per ina durada pli curta, èn dentant restads ina minoritad cun quella pretensiun.
Sco proxim decida il Cussegl dals chantuns, probablamain en la sessiun d'enviern.
