Las partidas tramettan en la cursa tantas glistas e candidaturas sco anc mai a chaschun da las elecziuns da l'october. Per in sez en il Cussegl naziunal candideschan 5'909 persunas en ils 20 chantuns da proporz, quai èn 1'264 u 27% dapli che anc avant quatter onns. Vitiers vegnan anc pliras persunas en ils sis chantuns da majorz. Las candidatas ed ils candidats sa preschentan sin 618 glistas, 21% dapli che a las ultimas elecziuns, sco l'Uffizi federal da statistica ha communitgà il glindesdi, suenter la fin uffiziala per annunziar glistas per las elecziuns federalas.
In terz da las candidaturas da duas partidas
Cumpareglià cun il 2019 datti dentant medem bler colliaziuns da glistas. En tut datti 80, ina pli pauc ch'avant quatter onns. Las pli bleras glistas han l'Allianza dal Center e la Partida verd-liberala. Questas duas partidas represchentan bunamain in terz da tut las candidatas e candidats.
Dapli dunnas
I n'ha er anc mai dà ina uschè gronda proporziun da dunnas che candideschan. La part è s'augmentada sin in record da 40,8%. E davart la vegliadetgna: Quasi mintga terza candidata u candidat è sut 30 onns.
Dal tut fix n'è il dumber da 5'909 candidaturas betg, En ils chantuns Appenzell Dadens e Dadora, Uri e Glaruna datti naginas glistas. Là po mintga persuna ch'ha il dretg d'eleger sin nivel chantunal era vegnì elegì – e candidaturas pon vegnir annunziadas fin al di da l'elecziun, per exempel en las medias.
