Berset è dapi il 2012 commember da la regenza svizra. Avant las medias ha Alain Berset accentuà ch'el na sa retiria betg, el fineschia anc sia legislatura. El dementescha er ch'el haja annunzià ina candidatura avant curt envers SRF. E la finiziun da ses temp sco cusseglier federal n'haja er betg da far cun l'affera cun ses pledader da media Peter Lauener e las indiscreziuns envers il CEO da Ringier.
Igl è in bun mument per chalar.
Las medias èn adina er marvigliusas co i va vinavant. Uschia ha ina schurnalista dumandà tgi che Alain Berset pudess s'imaginar sco successur.
I duai esser in uman. […] I dovra avertadad, diversitad e toleranza.
Candidats e candidatas da la PS
Gia il di da la retratga han cumenza speculaziuns davart la candidaturas per la successiun da Berset. Numnà vegnan tranter auters er il cusseglier naziunal grischun Jon Pult, il president da la citad da Basilea Beat Jans, la cussegliera dals cantuns da basilea Eva Herzog, che aveva pers stgars cunter Elisabeth Baume-Schneider tar l'elecziun per la successiun da Simonetta Sommaruga.
Il cusseglier dals chantuns da Turitg Daniel Jositsch ha gia ditg envers SRF ch'ina candidatura saja in tema, el veglia dentant l'emprim discutar ella cun sia partida chantunala.
Tge fan ils verds sch'il sez vegn liber?
La demissiun d'Alain Berset dat stausch a la debatta per in sez en il Cussegl federal per ils verds. A las elecziuns dal Cussegl federal il december che vegn vul la partida sa participar cun in candidat u ina candidata. Quai ha la partida annunzia curt suenter che Berset ha annunzià sia demissiun. Suenter la demissiun da Simonetta Sommaruga avevan ils verds anc desistì d'ina candidatura per il sez liber. Il 2019 ha la partida verda betg gì success da conquistar in sez da la PLD cun la candidatura da Regula Rytz.
Las partida burgaisas PPS e PLD vulan mantegnair la furmla magica. Il schef da fracziun da la PPS Thomas Aeschi ha per exempel ditg envers SRF, che sche la PS vegnia a restar la segund pli ferma partida en las elecziuns parlamentaras, lura vegnan el a sustegnair in dals candidats uffizials da la PS.
Reacziuns dals parlamentaris Grischuns
Per il president dal Cussegl naziunal, Martin Candinas saja il telefon da Alain Berset cun la novitad stà ina surpraisa.
Jau hai prendì giu il telefon e da l’autra vart era Alain Berset. Jau ma sun dumandà: Tge vul il president da la Confederaziun da mai?
Martin Candinas haja apprezià la collavuraziun cun il president da la Confederaziun. E tenor ses parair ha Alain Berset adina lavurà tenor ses meglier savair e pudair. Stefan Engler di, che Alain Berset saja ina persunalitad ch'è disada da manar, cun intginas extravaganzas. La bilantscha politica saja plitost moderada. Martin Schmid di che Alain Berset saja stà in ferm manader. Dentant èn intgins temas era stads en sumbriva, per exempel cun ils problems da fidanza durant la pandemia.
Betg surstada era Anna Giacometti, la cussegliadra naziunala da la Partida liberaldemocratica. Surtut suenter la perioda intensiva pervia da la pandemia. Sco successur u successura vesa Anna Giacometti intgin da lingua tudestga, ella savess s'imaginar Jon Pult sco cusseglier federal.
Ils cussegliers dals chantuns, Stefan Engler da l’Allianza dal Center e Martin Schmid da la Partida liberaldemocratica na han fatg naginas supposiziuns, tgi che pudess surprender il sez en il Cussegl federal. Stefan Engler di, ch'i dependia da las elecziuns naziunalas l'october, sche la Partida socialdemocratica possia tegnair lur sez.
Las cusseglieras naziunalas Magdalena Martullo Blocher e Sandra Locher Benguerel ed il cusseglier naziunal Jon Pult n'eran betg cuntanschibels per RTR.
