Igl è in ulteriur chapitel enturn l'affera dal minister da sanadad Alain Berset e ses anteriur schef da communicaziun, Peter Lauener. A Lauener è vegnì renfatschà d'avair tramess infurmaziuns confidenzialas durant la pandemia da corona a la chasa da medias Ringier. Sinaquai ha in procuratur extraordinari survegnì l'incumbensa dad examinar questas renfatschas.
Il procuratur extraordinari ha lura dumandà infurmaziuns da l'Uffizi federal da tecnica ed informatica. L'uffizi haja lura tramess l'entira communicaziun dad e-mail da l'anteriur schef da communicaziun da Berset, Peter Lauener. Quai saja stà dapli che quai ch'il procuratur haja pretendì. La Procura publica federala suppona uss che l'uffizi haja uschia cuntrafatg al secret d'uffizi ed ha perquai avert ina procedura cunter nunenconuschent.
