Las decisiuns sa basan sin la varianta 1 ch'era ida en consultaziun. Sulettamain tar ils inscunters privats ha il Cussegl federal midà il dumber maximal tar inscunters cun persunas che n'èn betg vaccinadas. Las mesiras valan enfin ils 24 da schaner 2022.
Booster gia suenter 4 mais
Il minister da sanadad ha annunzià ch'i duai daventar pussaivel da sa laschar vaccinar cun il vaccin da rinfrestgament be 4 mais suenter la segunda vaccinaziun. La recumandaziun uffiziala vegn tenor l'Uffizi da sanadad a vegnir l'autra emna. Tenor Alain Berset haja quai ina impurtanta influenza en il cumbat cunter la varianta omicron.
Plinavant è la muntada da 2G+ vegnida precisada: Persunas ch'èn vaccinadas cumplainamain, èn attestadas sco guaridas u han survegnì il vaccin da rinfrestgament avant pli pauc che 4 mais, na ston betg sa laschar testar supplementar. Manaschis u occurrenzas che han be la regla da 2G pon voluntarmain sa decider per 2G+ per evitar l'obligatori da purtar mascrina e da seser.
Tests per certificats puspè gratuits
Davent da damaun vala: Tests svelts d'antigen e tests da pool da PCR vegnan puspè pajads da la Confederaziun. Autotests e tests singuls da PCR sco era tests d'anticorpuls na vegnan betg pajads. Tar persunas che han sintoms, che han gì contact cun persunas positivas u persunas ch'eran en in pool positiv, vegnan ils tests vinavant pajads.
Persunas vaccinadas u guaridas han puspè pli simpel da viagiar en Svizra
Davent da glindesdi dovran persunas guaridas u vaccinadas be in test negativ per viagiar en Svizra. Vul dir: In test da PCR ch'è betg pli vegls che 72 uras u in test svelt d'antigens che n'è betg pli vegls che 24 uras. Tgi che n'è ni vaccinà ni guarì dovra vinavant dus tests negativs, in avant ch'entrar en il pajais ed in 4 enfin 7 dis suenter.
La situaziun è alarmanta
Ils 13 da december eran 300 persunas pervia da Covid-19 sin las staziuns da tgira intensiva en Svizra. Davent da quai dumber da pazients e pazientas n'è in provediment optimal betg pli pussaivel. Ils tractaments da persunas cun autras malsognas ston vegnir spustads. Tenor las stimaziuns saja dad ir da quai anora che 350 enfin 400 pazients e pazientas da Covid-19 vegnan ad occupar ils letgs sin las staziuns da tgira intensiva. Il Cussegl federal ha recumandà als ospitals da spustar tractaments che n'èn betg urgents.
