Per la ministra da giustia Karin Keller-Sutter èsi pussaivel che la regla da 2G vegn en funcziun. En vista al svilup en ils ospitals stoppia probabel puspè vegnir tratg en la struba, ha ditg Keller-Sutter envers SRF.
Ins vegn segir a stuair discutar sche 2G vegn schlargià.
Pussaivel saja però er da schlargiar l'obligatori da mascrina e d'introducir instrucziun a distanza per las universitads. In obligatori da vaccinar general sclauda Keller-Sutter en vista a la situaziun legala. L'agir da stadi stoppia esser en proporziun – ed ins na saja anc betg tar in tal punct, ha Keller-Sutter ditg. Era uschè decidì è ella cunter serrar restaurants e butis en il cumbat cunter corona.
Venderdi s'inscuntra il Cussegl federal per sia proxima sesida ordinaria. Cler saja ch'i dettia en cas da novas decisiuns puspè ina consultaziun.