Ensemen cun ils cas da cussegliaziun existents ha il post sustegnì radund 870 persunas. Var 100 da las annunzias novas possian ins manar enavos ad ina midada en la statistica.
Ils davos onns saja il dumber da cussegliaziuns s’augmentà successivamain tant en il Grischun sco er en l’entira Svizra. Quai scriva l'Uffizi chantunal dal servetsch social. Persunas dal fatg decleran quest svilup cun ina pli gronda sensibilisaziun per il tema. Auters motivs na sclaudan els betg. I saja dentant difficil dad erruir els. Var dus terzs da tut las cussegliaziuns pon vegnir terminadas entaifer in onn. Intginas van dentat er sur plirs onns.
Radund la mesadad da las persunas pertutgadas da violenza rapportan da violenza corporala, psichica ubain sexuala.
In punct che las persunas dal fatg constateschan: L'intensitad da la violenza s'augmenta cura ch'ina victima vul bandunar la persuna violenta. Perquai saja impurtant da tschertgar agid gia avant.
L'Agid da victima Grischun porscha in termin da cussegliaziun entaifer 24 uras. Las cussegliaziuns cuntegnan sper in'analisa da la situaziun er cussegliaziun giuridica ubain emprimas mesiras per situaziuns da crisa.