Il Cussegl dals chantuns ha ditg cleramain Na a l'iniziativa d'AVS dals Giuvens liberals. Il Cussegl federal lavuria gia vi d'ina via da stabilisar l'AVS. L'iniziativa dals Giuvens liberals na saja perquai betg necessaria, è l'opiniun en la chombra pitschna. L'iniziativa vegn uss anc debattada en il Cussegl naziunal.
Autras vias da stabilisar l'AVS
L'iniziativa dals Giuvens liberals ha vulì colliar la vegliadetgna da la pensiun cun l'aspectativa da vita en Svizra. Sche lezza va ad aut muntassi quai automaticamain in auzament da la vegliadetgna da pensiun uffiziala. En in emprim pass fiss la vegliadetgna da pensiun vegnida auzada sin 66 onns per umens e dunnas.
Il Cussegl dals chantuns suonda la proposta dal Cussegl federal da refusar l'iniziativa senza cuntraproposta. I ha dà 30 cuntravuschs ed 11 persuenter. Emprim saja da spetgar tge ch'il Cussegl federal propona per stabilisar l'AVS per ils onns 2030 fin 2040.
Ulteriura iniziativa senza sustegn
Medemamain ha il Cussegl dals chantuns refusà suenter il Cussegl naziunal l'iniziativa per ina 13avla renta da l'AVS da l'Uniun sindicala svizra. La maioritad dal cussegl ha valità ils custs supplementars sco betg supportabels. Tenor il Cussegl federal avess in Gea muntà custs supplemntars da radund tschintg milliardas francs.
