En la revisiun dal dretg penal sexual è il Cussegl dals chantuns sa decidì per la varianta «Na munta na». Cun 25 cunter 18 vuschs. Uschia ch'i tanscha sche l'unfrenda di ubain mussa nunverbal ch'el u ella na vul betg sex, per valair sco abus sexual, mulesta sexuala, constricziun sexuala ubain violaziun. E quai duai da nov era valair, sch'il delinquent u la delinquenta na applitgeschan nagina violenza. Lez è anc cundiziun en la lescha vertenta.
Ina minoritad ferma era s'engaschada per la varianta «Gea è gea» che va pli lunsch e pretenda ch'i dovria avant il sex in cler consentiment a quel. Uschiglio valess quai sco violaziun.
Il Cussegl dals chantuns discutescha l'emna che vegn anc ulteriurs detagls da la revisiun dal dretg penal sexual, avant che lezza va en il Cussegl naziunal.
