Il Cussegl dals chantuns ha approvà la promoziun dal rumantsch e dal talian era ordaifer las regiuns da tschep. Quai en il rom da la discussiun en il parlament davart il messadi da cultura. La Chombra pitschna ha acceptà senza cuntravusch la proposta dal Cussegl federal d'ina basa legala per promover la diaspora rumantscha e taliana. La lescha da linguas duai pia vegnir adattada uschia che la Confederaziun po finanziar projects rumantschs e talians era ordaifer il Grischun ed il Tessin.
Adina dapli Rumantschas e Rumantschs vivan en la diaspora
La raschun per l'adattaziun da la lescha è ch'adina dapli Rumantschas e Rumantschs, sco era persunas cun lingua materna taliana vivan ordaifer ils territoris da tschep, pia ils territoris rumantschs e talians da la Svizra. Bun la mesadad da las Rumantschas e dals Rumantschs che na vivan betg pli en ils territoris rumantschs, vivan ordaifer il Grischun.
La fatschenta va ussa en il Cussegl naziunal. Era la chombra gronda sto anc discuttar ed approvar l'adattaziun da la lescha.
