Cun salvar la banca Credit Suisse ha la Confederaziun fin uss gudagnà 100 milliuns francs grazia ad entradas da premias. Quai ha ditg la ministra da finanzas Karin Keller-Sutter en in’intervista cun las gasettas da Tamedia.
Vitiers vegnian anc entradas da la Banca naziunala svizra. L’agid da liquiditad che saja segirà tras garanzias da la Confederaziun e che na saja fin uss anc betg vegnì pajà enavos, muntia actualmain a tschintg milliardas francs. Keller-Sutter quintia dentant ch’er questa summa vegnia pajada enavos proximamain.
I saja anc memia baud da pudair dir tge adattaziuns legalas ch’i dovria, per impedir in ulteriur «cas CS» en l’avegnir. En mintga cas stoppia la Finma vegnir rinforzada, per exempel duaja ella pudair dar multas. Ozendi saja quasi nunpussaivel da far star bun insatgi ch’haja disditg a moda gravanta.
