Gia l'emna passada ha l'armada annunzià da stritgar plirs events publics. Tenor retschertgas da SRF manchian ina milliarda francs per expensas gia fatgas. Quai vala per l'onn actual e per l'onn proxim. Il motiv per la rusna: L'armada saja sviada da l'atgna planisaziun. Quai rapporta SRF cun sa basar sin in document intern. Il plan saja stà da cumprar a partir dal 2016 pli pauc armament. Cun ils raps spargnads vulan ins lura finanzial novs jets da cumbat e rinforzar la defensiun da l'aria. Vi da quai n'hajan ins dentant betg sa tegnì.
A partir dal 2020 han ins cumprà en per summas pli grondas che planisà. Il Cussegl federal ed il parlament han approvà las cumpras da l'armada. In ulteriur motiv per la rusna: Ils custs da gestiun – per exempel tar l’informatica – sajan pli auts. Plinavant gioga la chareschia ina rolla.
Departament conferma rusna da 1,2 milliardas
Uss sa mussa che la rusna finanziala è anc pli gronda, numnadamain 1,2 milliardas francs. Quai haja il Departament federal da defensiun, VBS scrit suenter che las retschertgas da radio SRF èn vegnidas public. Dentant saja almain la finanziaziun d'armament per quest onn segirada, cunquai ch'ins haja pudì stuschar ils pajaments als furniturs sin pli tard. Quests 1,2 milliardas francs che mancan, vegnan a scader ils proxims 3 onns.
