La sonda passada ha la gasetta «Schweiz am Wochenende» rapportà davart indiscreziuns en il departament dad Alain Berset. Concret vai per ses anteriur schef da communicaziun, Peter Lauener. Quel haja adina puspè dà infurmaziuns secretas davart mesiras cunter corona planisadas a la chasa editura Ringier. La gasetta sa referescha sin e-mails e protocols d'interrogaziun dal procuratur public extraordinari Peter Marti. Para haja il schef da communicaziun da Berset gì ina lingia directa tar il schef da Ringier, Marc Walder, scriva la gasetta.
Peter Lauener na lavura dapi l'avust passà betg pli tar la Confederaziun. Per el vala la presumziun d'innocenza.
Berset na po betg dir bler
Il president da la Confederaziun Alain Berset ha la sonda prendì posiziun davart las rinfatschas envers ses anteriur schef da communicaziun. Envers RTS ha Berset numnà las indiscreziuns en connex cun las investigaziuns penalas dal procuratur public extraordinari illegalas e «scandalusas». El na possia e na veglia betg dir dapli en chaussa – ussa stoppia la giustia far la lavur. Las rinfatschas na sa drizzan er betg cunter el. El na saja era betg accusà.
Squitsch pudess crescher
Uschè simpel na saja la chaussa dentant betg per il Cusseglier Berset, di il correspundent da RTR en Chasa federala, Adrian Camartin. Era sche las investigaziuns na mussan betg che Berset haja gì enconuschientscha dals fatgs da ses collavuratur Lauener dettia anc adina la vart politica e morala. La dumonda saja sche Berset giaudia anc adina il sustegn da sia partida e da la populaziun. Senza pudess il squitsch da demissiunar crescher e quai gist en l'onn da la presidenza dad Alain Berset ed in onn cun elecziuns federalas.
Investigaziuns marschan
Gia la primavaira passada aveva il departament dad Alain Berset purtà plant pervia dad indiscreziuns durant la pandemia. Las relevaziuns actualas èn dentant vegnidas a la glisch tras investigaziuns pervia dad indiscreziuns en connex cun l'affera Cripto. Il procuratur public extraordinari Peter Marti ha perquai analisà la communicaziun electronica da Peter Lauener ed è tranter auter fruntà sin e-mails che lez ha tramess a Marc Walder, il CEO da Ringier. Omadus sco era il Cusseglier federal Berset haja Marti interrogà, uschia il rapport da la «Schweiz am Wochenende».
Era la cumissiun da gestiun dal Cussegl dals chantuns sa fatschenta cun il cas. Tenor lur vice-president, Werner Salzmann, veglian ins er interrogar Alain Berset. Sch'i vegn a dar ina PUK – ina cumissiun parlamentara d'inquisiziun – en quest connex na saja actualmain betg cler.