A l'entschatta da las contractivas davart las relaziuns futuras tranter la Svizra e l'Uniun europeica da glindesdi a Brüssel ha Amherd discurrì dad ina «nova fasa da las relaziuns». I giaja per stabilisar e sviluppar vinavant il partenadi. Interpresas duain pudair exportar lur products senza obstachels en l'Uniun europeica. Plinavant dovria ina collavuraziun buna e stretga tar il martgà d'energia, uschia Amherd.
Gia cun la partenza da las contractivas han perscrutadras e perscrutaders da la Svizra puspè access a tscherts programs da Horizon Europe. Propostas da la Svizra vegnian tractadas sco talas da pajais associads, sco che la presidenta da la Confederaziun Viola Amherd ha ditg.
Tar las tractativas davart ina nova cunvegna dettia bler da far ed ils teams stoppian chattar soluziuns. Amherd è glindesdi tranter auter scuntrada cun la presidenta da la cumissiun da l'UE Ursula Von der Leyen. Quella ha discurrì dad in pachet da 10 cunvegnas. La finamira saja da terminar quellas anc quest onn.
