La cumissiun da l'UE po contractar cun Berna davart relaziuns futuras tranter l'UE e la Svizra. Ils stadis commembers da l'UE han approvà mardi il mandat da la cumissiun da l'UE per tractativas cun la Svizra. Quai ha in funcziunari da l'UE ditg a l'agentura da novitad Keystone-SDA sin dumonda.
La tractanda era sin l'urden dal di dal cussegl per economia e finanzas. Quel aveva stuì approvar formalmain il mandat. Avant avevan gruppas da lavur e las represchentanzas permanentas dals stadis commembers da l'UE tractà il mandat che la cumissiun da l'UE aveva preschentà.
Suenter ch’il cussegl federal ha deliberà venderdi passà ses mandat disponan uss omaduas varts d’ina incumbensa. Las tractativas duain cumenzar anc quest mais, sco il Departament federal d’affars exteriurs EDA ha ditg l’emna passada.
Cussegl federal deliberescha il mandat da tractativas cun l'UE
Il Cussegl federal ha deliberà il venderdi il mandat definitiv per las tractativas cun l'Uniun europeica. Quel ha il cusseglier federal Ignazio Cassis preschentà. En quest mandat haja il Cussegl federal resguardà blers resultats or da la consultaziun. Las tractativas cumenzian uschè spert sco la Cumissiun europeica haja lur mandat definitiv, probabel en il decurs dal mars.
Bler interess en la consultaziun
Da la consultaziun dal sboz haja dà bler interess da cumissiuns parlamentaras, da partenaris socials e da l'economia, da gruppas d'interess e federaziuns. Il Cussegl federal haja constatà che la gronda part dals acturs sustegnian las tractativas sin basa dal pachet. El haja era decidì da surpigliar bleras da las recumandaziuns or da la consultaziun:
- Electricitad : Tar l'avertura dal martgà ha il Cussegl federal en mira da mantegnair la pussaivladad dad in provediment da basa protegì cun pretschs regulads sco era il dretg da returnar tar in provediment da basa regulà (service public).
- Cunvegna da traffic : Cun avrir il traffic da persunas sin rodaglias internaziunal è la finamira, da mantegnair la controlla sur da l'utilisaziun da las lingias en Svizra. La qualitad dal traffic public na dastga betg vegnir influenzada cun avrir a moda controllada il traffic sin rodaglias internaziunal.
- Cunvegna agrara : La suveranitad da la Svizra en la politica agrara vegn mantegnida. Las tariffas da dazi restan, sco era ils contingents da duana e las metodas da nizzegiar quels.
- Immigraziun : La finamira da l'immigraziun en favur al martgà da lavur vegn rinforzada, sco era la formulaziun dal dretg da dimora per proteger il sistem social da la Svizra.
- Protecziun da pajas : La finamira da mantegnair e proteger a moda duraivla las cundiziuns da paja e da lavur vegn rinforzada.
- Elements instituziunals : Tar la participaziun da la Svizra vi dal martgà intern da l'UE ha il Cussegl federal en mira ch'i duajan be esser pussiblas mesiras da gulivaziun en cas che la Svizra na surpiglia betg in svilup punctual dal dretg da l'UE, suenter ina decisiun dal tribunal da cumpromiss.
- Convenziun da commerzi liber : La cunvegna dal 1972 n'è betg part dal pachet da tractativas e na vegn betg tangada da las tractativas.
Uschia veglia il Cussegl federal avair ina buna basa ord vista svizra cun avair avunda spazi d'agir envers l'Uniun europeica.