La cumissiun da l'Uniun europeica ha deliberà il mandat per tractativas bilateralas cun la Svizra – in mandat ch'ils 27 stadis commembers han era anc da confermar. Detagls dal mandat n'èn betg enconuschents e betg publics.
Tenor communicaziun da l'UE cumpiglia quest però l'access da la Svizra al martgà da l'UE, propostas per il dossier da la libera circulaziun da persunas ubain era cundiziuns per che la Svizra possia puspè far part al programm da perscrutaziun da l'UE «Horizon Europe». En Svizra è il Cussegl federal sa cunvegnì l'emna passada ad in agen mandat per tractativas ch'è actualmain en la consultaziun.
«Nus terminain il 2023 cun in mument encuraschant per nossa relaziun bilaterala. Jau ma legrel sin ils proxims pass dal 2024» ha Maros Sefcovic, il vicepresident da la cumissiun d'UE communitgà via X.
