Cun tecnologia svizra vul il cusseglier federal Albert Rösti gidar a realisar la midada energetica. Al WEF a Tavau è Rösti sa preschentà per l'emprima giada sco minister d'energia avant in publicum internaziunal. Ses messadi: La pitschna Svizra possia contribuir en l'agen pajais mo pauc per cuntanscher la midada energetica.
In effect bler pli grond haja sche la Svizra exporteschia sin l'entir mund ses products da high-tech – sco per exempel carburants neutrals al clima. La collavuraziun pli stretga cun ils pajais vischins en il sectur d'electricitad, ch'è tenor expertas ed experts da gronda muntada, n'ha Rösti betg menziunà.
Il suentermezdi è Albert Rösti s'inscuntrà cun la branscha d'electricitad svizra. Al congress a Berna ha el accentuà che la Svizra saja memia fitg dependenta d'imports d'energia, cunzunt era d'electricitad. La crisa en connex cun la guerra da la Russia cunter l'Ucraina haja mussà che quai saja in privel per il bainstar da l'economia e da la populaziun. I dovria perquai dapli stentas per augmentar a moda sperta la producziun indigena.
Sustegn finanzial per ovras atomaras
Cun vista sin las ovras atomaras ha il nov minister d'energia ch'i saja impurtant che las quatter ovras existentas possian producir uschè ditg sco quai ch'ellas èn segiras. «Nus discurrin oz da temps da manaschi da 60 onns. Quai munta che l'ovra atomara da Leibstadt po anc restar circa 20 onns a la rait.» El speria ch'ils custs da mantegniment sajan curclads per il futur. Là nua che quai na saja betg il cas examineschia l'Uffizi federal d'energia quant enavant ch'i saja pussaivel da sustegnair finanzialmain ils possessurs.
