Las davosas duas emnas ha la Svizra bloccà 7,5 milliardas francs facultat russa sin basa da las sancziuns. I sa tracta da contos bloccads sco era d'immobiglias en quatter chantuns. Quai ha Erwin Bollinger, il manader dal secretariat statal per economia Seco, ditg a la conferenza da medias a Berna. Nagin auter pajais haja bloccà tants daners.
Il Cussegl federal veglia era surpigliar en l'avegnir sancziuns che l'UE concluda. Tenor l'Uniun svizra da banchiers èn tranter 150 e 200 milliardas francs da persunas russas sin contos svizzers. Ma betg tut las persunas russas sajan sancziunadas.
Per irritaziun al point de presse dad oz a Berna ha la damonda procurau, sch'ils cantuns stoppian tschertgar activamein possess da persunas sin la glista da sancziuns. Il SECO n'ha betg vulì respunder questa dumonda - ha dentant accentuà ch'ils chantuns sajan obligads da bloccar tals possess sch'els hajan enconuschientscha da tals.
Sa registrar tant pli spert
Persunas ch'èn fugidas da l'Ucraina duain sa laschar registrar tant pli svelt tar la Confederaziun. Pli spert ch'il status da protecziun «S» saja confermà e pli spert ch'i dettia daners da l'agid social. Quai ha ditg Gaby Szöllösy, la secretaria generala da la Conferenza da las directuras ed ils directurs socials dals chantuns. Quants daners ch'i dat variescha da chantun tar chantun. Cler saja dentant che persunas che basegnan protecziun hajan dabun agid d'urgenza.
Da quai da 30'000 persunas scappadas ord l’Ucraina hajan dumandà per agid en Svizra il mais passà. Circa 26’000 persunas hajan ins pudì reparter sin ils chantuns.
