Il president da la Confederaziun Alain Berset ha concedì d'avair tschernì ils fauss pleds en connex cun la guerra en l'Ucraina. En ina intervista da la fin d'emna cun la «NZZ am Sonntag » aveva el defendì la posiziun dal Cussegl federal ch'è cunter dar vinavant armas svizras. Latiers aveva Berset avertì dad «ina extasa da guerra» che regia en tscherts circuls. Quai ha procurà per critica, tranter auter er dal co-presidi da sia atgna partida.
Betg be rearmament
I na saja betg stà sia intenziun da crititgar persunas specificas u stadis, uschia Berset en ina intervista cun il «Tages Anzeiger» online. El haja sulettamain vulì mussar ch'i dettia er autras pussaivladads da sustegnair l'Ucraina. I saja cler che la resposta sin la guerra na possia be esser rearmaments. Gista la Svizra duaja pensar en la logica da la diplomazia e la pasch, quai saja la fermezza da la Svizra, uschia il cusseglier federal vinavant.
