A la fin èsi ì per la dumonda: Beat Jans u Daniel Jositsch. E per impedir ch'il candidat selvadi daventia cusseglier federal haja lura, sco quai ch'ins auda sin ils sulers da la Chasa federala, ina pulita part da las parlamentarias e dals parlamentaris dà la vusch al basilais. Il resultat plitost mediocher da Jon Pult sa lascha segir declerar almain per part cun quella dinamica. Tschella vardad è dentant era ch'il candidat grischun n’ha betg gì il dretg profil. Memia giuvens, memia pauca experientscha en l'executiva, memia rural e forsa era memia eloquent e memia segir da sasez.
Ed anc ina segunda chaussa han las elecziuns mussà cleramain. Propi cuntent sco quai ch'i marscha il mument n’è nagin. La furmla magica ha pers sia traglischur. Era sche la maioritad da l’Assamblea federala n’è quella giada anc betg stada pronta da tschentar la concordanza, questa istorgia da success da la Svizra, sin in fundament nov, na vegnan ils responsabels da las partidas betg a pudair scappar da la discussiun. Il pli tard en quatter onns vegnan las pretensiuns giustifitgadas d'integrar in pli grond dumber da las votantas e dals votants en la regenza puspè sin maisa. Tge partida duai avair quants sezs. Da lura puspè sa zuppar davos il credo che la betg elecziun da cusseglieras e cussegliers federal en uffizi destabiliseschia la democrazia svizra, na tanscha lura betg pli.
