En l'ustaria a Berna nua che exponents e commembras da la Partida socialdemocratica da tut la Svizra èn sa radunads hai dà tut las emoziuns. Entant ch'ils da Basilea Citad pon festivar lur emprim cusseglier federal dapi 50 onns, hai dà la trumpada tar ils Grischuns e las Grischunas.
Betg be frust per manadra da campagna Sandra Locher-Benguerel
Per la manadra da campagna da Jon Pult ed anteriura cussegliera naziunala grischuna Sandra Locher-Benguerel na saja betg be stà frust suenter questas elecziuns, mabain er plaschair per Beat Jans che vegnia segir a far buna lavur sco cusseglier federal, sco ella ha ditg envers RTR. Quai ch'ha dentant dà da studegiar ad ella sajan stadas las 70 vuschs per Daniel Jositsch.
Tge ch'è uss propi stà la raschun che Daniel Jositsch ha fatg 70 vuschs e Jon Pult mo 54 na possia Sandra Locher Benguerel anc betg giuditgar. Ella haja sentì bler sustegn per Pult or dal parlament durant sia lavur da campagna. La finala saja forsa in votum per dapli experientscha. E las vuschs che Daniel Jositsch haja fatg – quai saja lura anc dad analisar entaifer la partida naziunala.
Franziska Preisig è trumpada
Sco in culpant cursescha era il num Daniel Jositsch adina puspè atras las retschas da la delegada da Jon Pult. Era Franziska Preisig deputada dal cussegl grond vesa quai in zic sco motiv. Ella è dentant era fitg cuntenta cun Beat Jans sco cusseglier federal. Mo sch'ella è sincera è ella era in zic trumpada ch'ella na dastga uss betg far il viadi dal Cussegl grond en il Cussegl naziunal per ruschnar suenter a Jon Pult.
Tenor Aita Biert ha Jon Pult fatg tut endretg
Era la deputada dal Cussegl grond Aita Biert, è era trumpada, manegia che Jon Pult haja fatg tut endretg ed ha cun ses pleds bunamain anc empruvà da far curascha per il futur:
Andrea Hämmerle vesa pliras raschuns daco ch'i n'ha betg tanschì per Pult
L'anteriur cusseglier naziunala da la ps grischuna Andrea Hämmerle sa mussa er trumpà per Jon Pult. Tenor el pudess quai avair pliras raschuns che Pult n'è betg vegnì elegì. Para sajan ils purs stà cunter el, probabel er la gronda part da la PPS perquai ch'el saja forsa memia sanester u er che Pult saja memia giuven e stettia lura memia ditg en il Cussegl federal.
Peter Peyer è in zic pli pragmatic
Era il cusseglier guvernativ grischun Peter Peyer è trumpà, dentant haja Jon Pult fatg in bun cumbat electoral ch'el saja insumma vegnì sin il ticket. El na craja betg che Pult haja gì ina schleta strategia. Quai che saja stà difficil, saja stà la constalaziun en il cussegl, ch'ins haja ditg ch'ins sa tegnia vid il ticket uffizial, ma quai ch'è lura la fin finala betg stà uschia.
Cussegl federal vinavant senza represchentant rumantsch
La Lia Rumantscha deplorescha ch’il Cussegl federal sa cumpona vinavant senza cusseglier federal rumantsch. Suenter Felix Calonder da Trin, ch'è stà en il Cussegl federal tranter il 1913 ed il 1920, avess la Svizra cun Jon Pult suenter passà 100 onns puspè gì in cusseglier federal rumantsch, sco ella ha scrit en ina communicaziun. In Cussegl federal cun commembras e commembers da tut las quatter cuminanzas linguisticas fiss stà in progress per la represchentativitad linguistica dal guvern da la Svizra.
Tge din ils parlamentaris grischuns dal resultat?
Martin Candinas avess gì plaschair sche Jon Pult fiss vegnì elegì. Che Daniel Jositsch ha fatg tantas vuschs durant tut ils trais scrutinis è stà ina gronda surpraisa per el. Quai mussia che betg tuts èn sa tegnids vi dal ticket. Ed er che «la partida socialdemocratica n'ha betg ferm enta pugn tut ils candidats – cunzunt betg ils salvadis».
Anna Giacometti è fitg trumpada che Jon Pult n'è betg vegnì elegì. Ella avess gì plaschair da festivar ensemen cun Jon Pult l'autra emna. Plinavant na chapescha ella betg daco che Daniel Jositsch è restà en la cursa, malgrà ch'el n'era betg sin il ticket.
Per Anna Giacometti hai dà in mument da surpraisa, ella ha numnadamain survegnì 15 vuschs tar la reelecziun da la cussegliera federala Karin Keller-Sutter. Per ella saja quai penibel, sco quai ch'ella ha ditg envers RTR. Plinavant n'ha ella betg ambiziuns sin in sez en il Cussegl federal.
Per Martin Schmid, cusseglier dals chantuns, na saja quai betg stà ina surpraisa che Beat Jans è vegnì elegì. Tenor Schmid sajan pliras raschuns pussaivlas daco ch'i n'ha betg tanschì per Jon Pult. Per l'ina la situaziun geografica u er la posiziun tematic, per l'autra dentant er l'experientscha executiva che manca a Pult, cumpareglià cun Jans.
Magdalena Martullo è cuntenta cun il resultat da las elecziuns. Sin la dumonda daco ch'ella manegia ch'igl n'ha betg tanschì per Jon Pult, ha ella ditg che quai haja probabel da far ch'el haja pli pauc experientscha ed er da la vegliadetgna tranter Jon Pult e Beat Jans saja ina gronda differenza. A tgi ch'ella ha dà sia vusch n'ha ella betg ditg, dentant saja stà in dals dus candidats dal ticket.
Ed er tenor Roman Hug saja probabel l'experientscha stada la raschun, daco ch'igl n'ha betg tanschì per Jon Pult. Sche Beat Jans vegn a far buna lavur en il Cussegl federal, na possia il cusseglier naziunal grischun anc betg dir stan oz, dentant saja el optimistic. Era Hug n'ha betg vulì dir a tgi ch'el ha dà sia vusch.
Per Stefan Engler n'è il resultat da Beat Jans betg stà surprendent. Dentant è Engler da l'avis che Jon Pult haja fatg ina buna figura durant questas emnas. Il resultat saja er stà in zic disturbà entras Daniel Jositsch ch'ha survegnì bleras vuschs, malgrà ch'el n'è betg stà sin il ticket. Engler aveva dà sia vusch a Jon Pult.
